उदयपुर : उदयपुरको बेलका नगरपालिका–५ जहडामा स्कुल बस र अटो ठोक्किँदा दुई महिलाको मृत्यु भएको छ भने तीन जना गम्भीर घाइते भएका छन्।
सोमबार बिहान करिब ९ः४५ बजेतिर सुपाडेबाट लालबजारतर्फ आउँदै गरेको प्र.०५–००१ ह ०६१३ नम्बरको अटो र विपरीत दिशाबाट जाँदै गरेको को १ ख ३५१६ नम्बरको सफल आदर्श इङ्लिस बोर्डिङ स्कुलको बस आपसमा ठोक्किएका थिए।
दुर्घटनामा अटोमा सवार पाँचै जना घाइते भएका थिए। घाइतेमध्ये बेलका नगरपालिका–५ की ३४ वर्षीया मन्दिरा मगर र नाम, थर तथा वतन नखुलेकी एक महिलाको उपचारका क्रममा मृत्यु भएको हो।
उनीहरूलाई उपचारका लागि धरानस्थित बीपी कोइराला स्वास्थ्य विज्ञान प्रतिष्ठान लगिएको थियो। अस्पतालका चिकित्सकले दुवैलाई मध्याह्न ११ः४५ बजेतिर मृत घोषणा गरेका थिए।
दुर्घटनामा अटो चालक बेलका–५ का २८ वर्षीय इन्द्र थापा र सोही ठाउँका १८ वर्षीय रोशन मगर गम्भीर घाइते भएका छन्।
विराटनगर महानगरपालिका–१२ का १९ वर्षीय अजित गुरुङको अवस्था मध्यम रहेको प्रहरीले जनाएको छ। तीनै जनाको बीपी कोइराला स्वास्थ्य विज्ञान प्रतिष्ठानमा उपचार भइरहेको छ।
दुर्घटनापछि इलाका प्रहरी कार्यालय रामपुर ठोक्सिलाबाट खटिएको प्रहरीले बस र चालक बेलका–५ का ३६ वर्षीय विक्रम थापालाई नियन्त्रणमा लिएको छ।
प्रहरीले दुर्घटनाको कारणबारे थप अनुसन्धान गरिरहेको जनाएको छ।
Discussion about this post