इटहरी : गाउँपालिकाले सञ्चालन गरेको सीपमूलक तालिममा प्रशिक्षकको काम दिलाउन पदको प्रभाव प्रयोग गरेको र त्यसबापतको रकम आफ्नै छोराको बैंक खातामार्फत लिएको आरोपमा सोलुखुम्बुको सोताङ गाउँपालिकाकी उपाध्यक्ष अन्जु नाछिरिङ राईविरुद्ध अख्तियार दुरुपयोग अनुसन्धान आयोगले विशेष अदालतमा आरोपपत्र दायर गरेको छ ।
आयोगका अनुसार आर्थिक वर्ष २०८०।८१ मा गाउँपालिकाले सञ्चालन गरेको ९० कार्यदिनको ढाका सिलाइ–बुनाइ तालिममा प्रशिक्षकको रूपमा काम दिलाएबापत राईले सेवाग्राहीसँग ४५ हजार रुपैयाँ माग गरेकी थिइन् ।
माग गरिएको रकम भने राईले आफ्नै नाममा नलिई छोरा सुनील नाछिरिङ राईको बैंक खातामा रहेको क्यूआर कोडमार्फत जम्मा गर्न लगाएको अनुसन्धानबाट खुलेको आयोगको दाबी छ ।
अनुसन्धानका क्रममा उपाध्यक्ष राईले आफ्नो पदीय जिम्मेवारीको क्रममा तालिममा प्रशिक्षकको काम दिलाउन तथा तालिममा सहजीकरण गरे–गराएबापत छोरा सुनीलसँगको मिलेमतोमा घुस लिएको, लिन लगाएको देखिएको आयोगले जनाएको छ ।
आयोगले उपाध्यक्ष राईको हकमा ४५ हजार रुपैयाँ बिगो कायम गरी भ्रष्टाचार निवारण ऐन, २०५९ को दफा ३ (१) बमोजिम कैद तथा बिगोबमोजिम जरिवाना सजायको मागदाबी गरेको छ ।
त्यस्तै, छोरा सुनीलविरुद्ध पनि आमासँगको मिलेमतोमा सेवाग्राहीबाट ४५ हजार रुपैयाँ घुसबापतको रकम लिई उपाध्यक्षका निमित्त उपलब्ध गराएको र प्रयोगमा ल्याएको आरोपमा मुद्दा दायर गरिएको छ । उनका हकमा पनि ४५ हजार रुपैयाँ बिगो कायम गरी कैद तथा बिगोबमोजिम जरिवानाको मागदाबी गरिएको आयोगले जनाएको छ ।
आयोगका प्रवक्ता सुरेश न्यौपानेका अनुसार दुवैजनाविरुद्ध बुधबार विशेष अदालत, काठमाडौंमा आरोपपत्र दायर गरिएको हो ।
Discussion about this post