विराटनगर । कोशी प्रदेशका झापा, मोरङ, सुनसरी र इलामका विभिन्न स्थानबाट प्रहरीले लागूऔषधसहित १४ जनालाई पक्राउ गरेको छ।
प्रहरीका अनुसार असोज ३ गते झापाको मेचीनगर नगरपालिका–७ बाट नारायण किसानलाई १० ग्राम ९ सय मिलिग्राम ब्राउन सुगरसहित पक्राउ गरिएको छ। सोही स्थानबाट संजित राजवंशी र प्रवीण उराउलाई १३० मिलिग्राम ब्राउन सुगरसहित पक्राउ गरिएको छ। यस्तै, दमक नगरपालिका–१ बाट किरण साम्बा लिम्बु र रोशन राईलाई १ ग्राम ७३० मिलिग्राम ब्राउन सुगरसहित नियन्त्रणमा लिइएको प्रहरीले जनाएको छ।
मोरङको पथरीशनिश्चरे नगरपालिका–१ बाट करण राईलाई १ ग्राम ११० मिलिग्राम ब्राउन सुगर तथा सुक्रबहादुर तामाङ र सन्दिप राईलाई ३१ ग्राम ११० मिलिग्राम गाँजासहित पक्राउ गरिएको छ। त्यस्तै, कानेपोखरी गाउँपालिका–६ बाट विक्रम गुरुङ र केविना गुरुङलाई ५ ग्राम ७० मिलिग्राम ब्राउन सुगरसहित पक्राउ गरिएको प्रहरीले जनाएको छ।
सुनसरीको इनरुवा नगरपालिका–१० बाट प्रहरीले को १ च ८२७९ नम्बरको टाटा पिकअपमा लुकाएर राखिएको १ हजार ४ सय ५४ किलो ८७० ग्राम गाँजा बरामद गरेको छ। उक्त पिकअपका चालक भोक्राहा नरसिंह–५ का ३० वर्षीय रामबहादुर यादवलाई समेत प्रहरीले नियन्त्रणमा लिएको छ।
यसैगरी, इलाका प्रहरी कार्यालय महेन्द्रनगरले भारत बिहारका २० वर्षीय विपिन कुमार यादवलाई ८३० मिलिग्राम ब्राउन सुगरसहित पक्राउ गरेको छ। जिल्ला प्रहरी कार्यालय इलामले इलाम नगरपालिका–९ बाट मौसम लिम्बु र मनिसा लिम्बुलाई ५४० मिलिग्राम ब्राउन सुगरसहित पक्राउ गरेको जनाएको छ।
पक्राउ परेका सबैमाथि थप अनुसन्धान भइरहेको प्रहरीले जनाएको छ।
Discussion about this post