पित्तथैलीमा भएको पत्थरीको अप्रेसन पछि मृत्यु भएकी इटहरी २० तरहराकी ३१ बर्षीया दीपा राईको डाक्टरको लापरबाहीका कारण मृत्यु भएको भन्दै आफन्तहरु आक्रोशित बनेका छन् ।
धरान १० स्थित विजयपुर हस्पिटलमा सोमबार दुरबिन प्रविधिबाट पत्थरीको अप्रेसन गरिएकी राईको भोलीपल्ट शरीरभित्र रक्तस्राव भई मृत्यु भएको थियो ।
हस्पिटलभित्रै दुई पक्षबीच छलफल चलिरहदा हस्पिटल मुलगेटमा प्रहरीले कडा सुरक्षा दिइरहेको छ । हस्पिटलमा प्रवेश गर्ने मानिसहरुलाई पनि प्रहरीले कडाई गरेको छ ।
ईलाका प्रहरी कार्यालय धरानका डीएसपी ज्ञानेन्द्र बस्नेतका अनुसार पीडितको जाहेरी दर्ता भइसकेको छ । ‘जाहेरी दर्ता भइसकेको छ, जाहेरी अनुसार अनुसन्धान हुन्छ,’ बस्नेतले भने ।
विजयपुर हस्पिटलका डाक्टर गजेन्द्रप्रसाद दासले राईको अप्रेसन गरेका थिए ।
अप्रेसन पछि शरीरभित्र निरन्तर रक्तस्राव भएको र अन्तिम समयमा मात्र उनले वीपी कोइराला स्वास्थ्य विज्ञान प्रतिष्ठानमा रिफर गरेको कारण श्रीमतीको मृत्यु भएको उदृत गर्दै श्रीमान् राजेन्द्र राईले डा. दासविरुद्ध प्रहरीमा जाहेरी दिएका छन् । मृतक राईले करिब एक महिनादेखि नै विजयपुर हस्पिटलमा उपचार गराइरहेकी थिइन् ।
उनलाई माघ ४ गते भर्ना गरेर अप्रेसन गरिएको थियो । अप्रेसन पछि अब्जरवेसनमा राखिएकी राईको रक्तस्राव भइरहेको उनका श्रीमानको जाहेरीमा उल्लेख गरेका छन् ।
Discussion about this post