६ लेन सडक परियोजना : तरहरादेखि धरानसम्म ४ लेन मात्र बन्ने, झण्डै १५ सय रुख काटिदैँ

इटहरी : विराटनगरको रानीदेखि धरानसम्म निर्माणाधिन रहेको ६ लेन सडकको काम अहिले तीब्र रुपमा भईरहेको छ । इटहरी २० तरहराको पानीपियादेखि धरानसम्मको सडकको काम यतिबेला निर्माणाधिन रहेको छ ।

तरहरादेखि धरानको तीनकुने सम्म १० किलोमिटर सडक भने ४ लेन मात्र निर्र्माण हुने सडक विभागले जनाएको छ । व्यापारिक मार्ग विस्तार आयोजना अन्तर्गत कोशी राजमार्गमा निर्माणधिन ४९ किलोमिटर सडकमध्ये तरहरादेखि धरानसम्म सडक विस्तार गर्न १ हजार ४ सय ३० वटा रुख कटान गरिने र त्यसमध्ये केही रुखहरु काटिसकिएको ६ लेन सडक इटहरीका परियोजना व्यवस्थापक बद्री प्रसाद शर्माले जानकारी दिए ।

‘सहरी क्षेत्रमा फुटपाथ हुने भएकाले ६ लेन सडकको काम हुँदै आएको थियो,’ उनले टाकुरासँग भने, ‘यहाँ भने ४ लेनको मात्र सडक बन्ने तयारी गरिएको छ ।’ उनका अनुसार अहिले तरहरादेखि सेउती खोलासम्म रुख कटानको काम भईरहेको छ । ‘हामीले अहिलेसम्म करीब ६ सय बढी रुख कटान गरिसकेका छौँ,’ शर्माले भने, ‘रुख काटेर साइट क्लियर गर्ने काम भईरहेको छ ।’

उनका अनुसार काटिएको रुख डिभिजन बन कार्यालय सुनसरी अन्र्तगत सब डिभिजन बन कार्यालय तरहरामा राखिदैँ आएको छ ।

गएको असारयता आगामी तीन बर्षभित्रमा काम पूरा गर्ने गरी भिन्नाभिन्नै दुईवटा कम्पनीले ठेक्का पारेको र कामको गति अगाडि बढेको शर्माले बताए ।

उनका अनसार पानीपियादेखि सेउती खोलासम्म १ नम्बरको कन्ट्याक्टरले ठेक्का पाएको छ भने त्यहाँदेखि उता धरानसम्म २ नम्बरको कन्ट्याक्टरको ठेक्का पारेको उनले जानकारी दिए ।

शर्माका अनुसार जंगल क्षेत्रमा सवारीको चाप कम हुने भएकाले यहाँ ४ लेनको सडक निर्माण गर्न लागिएको हो । चारकोशे झाडीमा पर्ने यो क्षेत्रमा सरकारी निकायको अनुमतिमा जिल्लाको जंगल क्षेत्रका विभिन्न प्रजातिका रुख तीन दशकयताकै ठूलो संख्यामा कटान गर्न लागिएको हो ।

‘तरहराको पानीपिया क्षेत्रदेखि धरानको तीनकुने सम्मको सडकमा १ हजार ४ सय ३० वटा रुख कटान हुँन लागेको हो,’ उनले भने, ‘अहिले सहरी क्षेत्रमा २५–२५ मिटर सडक चौडा गरिएको छ भने बन क्षेत्रमा १५–१५ मिटर मात्र सडक चौडा गरिनेछ ।
सुनसरीमा कुल २४ हजार ८ सय ६५.५ हेक्टर वन क्षेत्र रहेको छ ।

जसमध्ये जिल्लामा तीन हजार पाँच सय १४.६ हेक्टर सामूदायिक वन क्षेत्र रहेको छ भने अन्य राष्ट्रिय वन क्षेत्रमा पर्छ । ६ लेनको मापदण्ड अनुसार सडक निर्माण गर्दा अरु थप रुख काट्नुपर्ने हुन्छ ।

धेरै रुख काट्दा जंगल विनास हुने खतरा रहेकाले यहाँ ४ लेन मात्र सडक निर्माण गर्न लागेको सडक विभागले जनाएको छ ।