इटहरी : इटहरी १ का कर्णबहादुर गुरुङको दुर्घटनामा मृत्यु भएको पाँच घण्टासम्म शव उठेको छैन ।
आइतबार दिउँसो २ बजेर १० मिनेटमा इटहरीबाट धरानतर्फ जादैँ गरेको प्रदेश १–०२–००१ ख ८६६५ नम्बरको ट्रिपरको ठक्करबाट स्थानीय गुरुङको घटनास्थलमै मृत्यु भएको थियो ।
पूर्व क्षेत्रीय ट्राफिक प्रहरी कार्यालय इटहरीका अनुसार दुर्घटनापछि आक्रोशित स्थानीयबासीले दुर्घटनामा मृत्यु भएको पाँच घण्टा वितिसक्दा समेत शब उठाउन मानेका छैनन् ।
‘ट्रिपरले ब्याक गरेर मारेको र मुचुल्कामा सोही व्यहोरा उल्लेख गर्नुपर्ने भन्दै आफन्तले माग गरेका छन्,’ एक ट्राफिक प्रहरीले फोन सम्पर्कमा टाकुरासँग भने, ‘ट्रिपर चालकले भने गुरुङ उभिएको नजिकै सामान अनलोड गर्नका लागि ब्याक गरिएको र नदेखेर दुर्घटना भएको बताउँदै आएको छ ।’
प्रहरीका अनुसार हालसम्म पनि इटहरी–धरान सडकखण्ड अबरुद्ध बनेको छ । दुवैतर्फ सडक बन्द भएका कारण यातायातमा समेत कठिनाइ भएको प्रहरीले जनाएको छ ।
‘अहिले एम्बुलेन्स बाहेकका अन्य कुनै पनि सवारी चल्न नदिदाँ यातायातमा कठिनाइ भएको छ,’ ती प्रहरीले भने, ‘पीडितबीच हालसम्म पनि कुनै सहमति नभएका कारण समस्या भएको हो ।’
उक्त सडकखण्डमा हाल एम्बुलेन्स बाहेक केही चल्न दिइएको छैन ।
मृतक गुरुङ धरान जानका लागि बस कुरेर बसेको अवस्थामा ट्रिपरले ठक्कर दिएको प्रहरीको प्रारम्भिक अनुसन्धानबाट खुलेको छ ।
ट्रिपरको ठक्करबाट अनुहार स्पष्ट नदेखिने गरी गुरुङको शरीर क्षतबिक्षत अवस्थामा पुगेकाले समेत आफन्त आक्रोशित बनेको स्थानीयले बताएका छन् ।
यो पनि – इटहरीको गंगामार्गमा भयानक दुर्घटना, कर्णबहादुरको घटनास्थलमै मृत्यु
Discussion about this post