इटहरी : सरकारी नियमनकारी निकायले वैदेशिक रोजगारीलाई व्यवस्थित गर्न नसक्दा युवाहरू ठगिने क्रम रोकिएको छैन ।
वैदेशिक रोजगारीको नाममा युवा पुस्तालाई ठगी गर्ने मेनपावर तथा व्यक्तिहरूले ठगी गरेको उजुरी आउने गरेका मेनपावर कम्पनी ज्यादा छन् ।
बिना इजाजत शाखा कार्यालय खोलेर वैदेशिक रोजगारमा जानेहरूको राहदानी कब्जा गर्नेदेखि तोकिएको शुल्क भन्दा बढी रकम उठाउने कार्यमा यस्ता मेनपावरहरू प्रत्यक्ष संलग्न छन् ।
इटहरी उपमहानगर क्षेत्रमा मात्र १६ वटा इजाजत प्राप्त मेनपावर कम्पनीका शाखा कार्यालय छन् । तर, इटहरीमा ६० भन्दा बढी शाखा इजाजत नभएका मेनपावर कम्पनी छन् । जुन कानुनी रुपमा अवैध हुन् ।
यसरी सञ्चालित मेनपावर कम्पनीलाई कानूनी रूपमा प्रतिबध लगाउन पहल थालिएको छ ।
जसअनुसार श्रम तथा रोजगार कार्यालय विराटनगर, जिल्ला प्रशासन कार्यालय सुनसरी र प्रहरीको सहकार्यमा इटहरीमा सञ्चालित अवैध मेनपावरमा छापा मारेको हो । आइतबार इटहरीभित्र रहेका ७ वटा मेनपावरमा संयुक्त अनुगमन टोलीले छापा मारेको छ ।
७ वटामा ३ वटा मेनपावर अवैध भेटिएका छन् । अधिकांश अवैध मेनपावरमा पुगेको अनुगमन टोली कार्यालयमा ताला लगाएर हिँडेका छन् ।
अनुगमन टोलीले इटहरीको टेङ्ग्रा पुल पारी, धरान लाइन, गोरखा गल्ली तथा लण्डन होटल अगाडिमा रहेका मेनपावरहरूमाथि छापा मारेको थियो ।
आइतबार अनुगमन गरिएका मेनपावर कम्पनीमध्ये हरि मगरले सञ्चालन गर्ने ग्राण्ड स्वीइट, टंकमान राईको प्रोग्रेसिप र दीपक खतिवडाको लाइफ लाइन मेनपावर अवैध भेटिएको जनाइएको छ । त्यसमा प्रहरीले प्रोग्रेसिप मेनपावरका दुईजना महिला कर्मचारीलाई नियन्त्रणमा लिएको छ ।
अनुगमन टोलीले केही मेनपावरका कर्मचारीलाई समेत नियन्त्रणमा लिएर प्रहरीलाई बुझाएको छ । यसरी सञ्चालित मेनपावर कम्पनीबाट ठगिएको गुनासोको आधारमा अनुगमन गरिएको श्रम तथा रोजगार कार्यालय विराटनगरले जनाएको छ ।
अनुगमनको क्रममा पूर्व स्वीकृत नलिएका, शाखा कार्यालयको लागि स्वीकृत लिएका तर इजाजतपत्र नपाएका मेनपावर कम्पनी भेटिएको श्रम तथा रोजगार कार्यालय विराटनगरका शाखा अधिकृत पूण्यप्रसाद पौडेलले जानकारी दिए ।
अनुगमनको क्रममा अवैध रूपमा सञ्चालित मेनपावर बन्द अवस्थामा समेत भेटिएको उनले बताए । अनुगमनको पूर्व सूचना चुहिएका कारण धेरैजसो कम्पनी ताला ठोकेर सञ्चालक फरार भएको उनको भनाइ छ ।
साथै अनुगमन टोलीले अवैध रूपमा रहेका मेनपावर कम्पनीका घर धनीको समेत विवरण संलग्न गरिएको छ । घर धनीलाई त्यस्ता अवैध मेनपावर कम्पनीलाई घर तथा कोठा भाडामा नदिन पत्र काटिने जनाइएको छ । अनुगमनको क्रममा कतिपय मेनपावरले घर भाडा समेत नदिएर दुःख दिएको गुनासो अनुगमन टोलीसँग गरेका थिए ।
यसरी दैनिकजसो जन स्तरबाट गुनासो आएसंगै इलाका प्रहरी कार्यालय इटहरीले समेत केही मेनपावर कम्पनीका सञ्चालकलाई नियन्त्रणमा लिन थालेको छ । इटहरी उपमहानगर क्षेत्रमा अवैध रूपमा सञ्चालित कम्पनीहरू सञ्चालन गर्न नदिने इलाका प्रहरी कार्यालय इटहरीका डीएसपी खगेन्द्र खड्काले बताए ।
आइतबार अनुगमन गरिएका मेनपावर कम्पनीमध्ये हरि मगरले सञ्चालन गर्ने ग्राण्ड स्वीइट, टंकमान राईको प्रोग्रेसिप र दीपक खतिवडाको लाइफ लाइन मेनपावर अवैध भेटिएको जनाइएको छ । त्यसमा प्रहरीले प्रोग्रेसिप मेनपावरका दुईजना महिला कर्मचारीलाई नियन्त्रणमा लिएको छ ।
Discussion about this post