इटहरी : सुनसरी जिल्लाका विभिन्न स्थानमा एकैदिन चारवटा दुर्घटना भएको छ । शनिबार भएको चारवटा दुर्घटनामा दुईजनाको मृत्यु भएको छ भने आठजना घाइते भएको पूर्व क्षेत्रीय ट्राफिक प्रहरी कार्यालय इटहरीले जनाएको छ ।
इनरुवा ६ भोटेपुल स्थित पूर्व–पश्चिम लोकमार्गमा पश्चिमबाट पूर्वतर्फ आउँदै गरेको बा ६ च ७४८६ नम्बरको कार र विपरीत दिशाबाट जाँदै गरेको प्र १–०२–०४१ प १२१८ नम्बरको मोटरसाइकल एक आपसमा ठक्कर भई दुर्घटना हुँदा एकजनाको मृत्यु भएको छ भने तीनजना घाइते भएका छन् ।
मृत्यु हुनेमा कारमा सवार मोरङ रंगेली २ बस्ने वर्ष ७० की गोमादेवी सिग्देल रहेकी छिन् । उनको उपचारको क्रममा मृत्यु भएको प्रहरीले जनाएको छ । कार चालक मोरङ रंगेली २ बस्ने वर्ष ३८ को दीपक भट्टराई जिप्रका सुनसरीको नियन्त्रणमा रहेको प्रहरीले जनाएको छ ।
मोटरसाइकल चालक सुनसरी इनरुवा ६ बस्ने वर्ष २५ को सराद मन्सुरी, कारमा सवार मोरङ रंगेली २ बस्ने बर्ष ७७ को हरि प्रसाद सिग्देल, कारमा सवार सप्तरी कञ्चनपुर ७ बस्ने वर्ष ४२ की उर्मीला चापागाईं घाइते भएका छन् ।
उनीहरुको जिल्ला अस्पताल इनरुवामा उपचार भइरहेको पूर्व क्षेत्रीय ट्राफिक प्रहरी कार्यालय इटहरीले जनाएको छ ।
त्यस्तै, शनिबार नै बराहक्षेत्र नगरपालिका ११ स्थित भित्री सडक खण्डमा उत्तरबाट दक्षिणतर्फ जाँदै गरेको प्र १–०२–०४३ प ५८४ नम्बरको मोटरसाइकल आफैँ अनियनत्रित भई बिजुलिको पोलमा ठोक्किदाँ एकजनाको मृत्यु भएको छ ।
मृत्यु हुनेमा मोटरसाइकल चालक सोही ठाउँ बस्ने वर्ष १८ को निरनज्न उराउ रहेका छन् । दुर्घटनामा टाउकोमा चोट लागि गम्भीर घाइते भएका उनको उपचारको क्रममा जिल्ला अस्पताल इनरुवामा मृत्यु भएको प्रहरीले जनाएको छ ।
सोही मोटरसाइकलमा सवार सोही ठाउँ बस्ने वर्ष १९ को जयराम उरावको सामान्य चोट लागेको र उनको स्थानीय अस्पतालमा उपचार भइरहेको प्रहरीले जनाएको छ । तीब्र गतिका कारण दुर्घटना भएको प्रहरीले जनाएको छ ।
त्यस्तै, बराहक्षेत्र नगरपालिका १ स्थित भित्री सडक खण्डमा रामपुरबाट धरानतर्फ आउँदै गरेको प्र १–०२–०४३ प २६३९ न. को स्कुटी र बिपरीत दिशाबाट जाँदै गरेको को २९ प ९६६१ न. को मोटरसाइकल एक आपसमा ठक्कर हुँदा तीनजना सामान्य घाइते भएका छन् ।
घाइते हुनेमा स्कुटी चालक धरान १६ बस्ने वर्ष २२ को महमद मन्सुरी र स्कुटी पछाडि सवार सोही ठाउँ बस्ने वर्ष २२ को हेमन्त राजवंशी रहेका छन् । त्यस्तै, मोटरसाइकल चालक बराहा १ बस्ने वर्ष ३९ को राजेन्द्र राई घाइते भएका छन् । उनीहरुको धरानस्थित वीपी प्रतिष्ठानमा उपचार भइरहेको प्रहरीले जनाएको छ ।
त्यस्तै, इटहरी १७ स्थित पूर्व–पश्चिम लोकमार्गमा पूर्वबाट पश्चिमतर्फ जाँदै गरेको को ३५ प ८२६८ नम्बरको स्कुटरले पैदलयात्री रामधुनी नगरपालिका २ बस्ने वर्ष ४२ की काजु चौधरीलाई ठक्कर दिदाँ सामान्य घाइते भएका छन् । उनको स्थानीय अस्पतालमा उपचार भइरहेको प्रहरीले जनाएको छ ।
स्कुटर तथा स्कुटर चालक इटहरी १८ बस्ने वर्ष ४५ को दादरण चौधरी ईप्रका पकलीको नियन्त्रणमा रहेको प्रहरीले जनाएको छ ।
Discussion about this post