सुनसरी : कोरोना संक्रमणका कारण भीड नगर्न सुनसरी प्रशासनले आग्रह गरेको छ । तर, सुनसरीका सिडिओ भने सीमा वारपारमा कडाई गरिएको बेला सरकारी गाडी लिएर विराटनगर पारि भारतीय बजार जोगबनीमा शनिबार दिनभर किनमेलमा व्यस्त भएका छन् ।
सुनसरीका प्रमुख जिल्ला अधिकारी उमेश ढकालले प्रयोग गर्दै आएको सरकारी नम्बर प्लेट ‘को १ झ ५५५’ गाडी प्रयोग गरेर परिवारसहित जोगबनीमा ‘सपिङ्ग’ गर्न पुगेका हुन् ।
सरकारी गाडी भन्सार क्षेत्रमा राखेर महिलाको एक समूह जोगबनीमा किनमेलका लागि गएपछि रानीका स्थानीय युवाहरुले गाडीलाई नियन्त्रणमा लिएका थिए । गाडी रानीको भन्सार क्षेत्रको एक नम्बर ढाटमा राखिएको थियो । किनमेल गरेर फर्केपछि युवाहरुले दुई नम्बर ढाटमा गाडी नियन्त्रणमा लिएका हुन् ।
विराटनगर–१७ का युवा हमिद आजादका अनुसार शनिबार सरकारी गाडी प्रयोग गरेर जोगबनी बजार भर्न आएको देखेपछि गाडी नियन्त्रणमा लिएर इलाका प्रहरी कार्यालय रानीको रोहबरमा जिम्मा लगाइएको थियो ।
‘सीमाका जनतालाई औषधि किन्न जोगबनी जानुपरे चोरबाटो जानुपर्छ,’ स्थानीय युवा हामिद आजादले भने, ‘सरकारी गाडी सीमामा रोकेर सहजै प्रवेश गरेको देखेपछि हामीले रोक्यौं, रोक्ने जानकारी पाएपछि सिडिओ साब अर्कै बाटो पैदल जानुभो ।’
खरिद गरिएका सामान ल्याउँदै गाडीमा हालेको देखेपछि युवाहरुले सरकारी गाडीको दुरुपयोग गरिएको भन्दै विरोध गरेका थिए । त्यसपछि प्रहरीले किनमेल गर्न आउने परिवारलाई अर्कै बाटो प्रयोग गरेर नेपाल प्रवेश गराएको थियो ।
यो पनि – कोभिडका बिरामी बढेकाले सचेत रहन जिल्ला प्रशासन सुनसरीद्वारा सूचना जारी (सूचनासहित)
Discussion about this post