प्रहरीको निशानामा इटहरीका लागूऔषध कारोबारी, नौ दिनको अवधिमा १४ जना पक्राउ (तस्वीर तथा भिडियोसहित)

इटहरी : बढ्दो शहरीकरणसँगै सुनसरीमा लागूऔषधको व्यापार फस्टाउँदो छ । प्रहरीले जिल्लामा एक वर्षमा दर्जनौँ मुद्धा दर्ता गरेको छ भने उत्तिकै संख्यामा लागूऔषधमा संलग्न व्यक्तिहरुलाई कानूनी दायरामा समेत ल्याएको छ ।

यसै सन्र्दभमा इटहरी प्रहरीले नौ दिनको अवधिमा १४ जना लागूऔषध कारोबारी तथा सेवनकर्तालाई पक्राउ गरी सार्वजनिक गरेको छ ।

आइतबार इलाका प्रहरी कार्यालय इटहरीले पत्रकार सम्मेलन गर्दै तीन दिनको अवधिमा ८ जनालाई पक्राउ गरी सार्वजनिक गरेको हो भने नौ दिनको अवधिमा १४ जनालाई पक्राउ गरेको प्रहरीले जनाएको छ ।

इटहरी प्रहरी प्रमुख डीएसपी अर्जुन केसीका अनुसार असार १८ गतेदेखि २७ गतेसम्म इटहरीका विभिन्न ठाउँबाट प्रहरीले लागूऔषध खैरोहिरोइन (ब्राउनसुगर) १९२ ग्राम, एक सय मिलिग्राम, नाइट्रोजन ट्याबेलेट एक सय पत्तामा रहेका एक हजार थानसहित १४ जनालाई पक्राउ गरेको हो ।

उनका अनुसार २५ असार (शुक्रबार) इटहरी ६ मा लागूऔषधको कारोबार भइरहेको भन्ने सूचनाका आधारमा प्रहरीले सुनिल तामाङ, सन्दिप चौधरीलाई ९ ग्राम खैरोहिरोइन ब्राउनसुगरसहित पक्राउ गरेको छ ।

अनुसन्धानका क्रममा उनीहरुले इटहरी ९ बस्ने प्रताप तामाङबाट खरिद गरेको खुलेकाले प्रतापलाई पनि १ ग्राम ३२० मिलिग्राम ब्राउनसुगरसहित पक्राउ गरेको छ ।

त्यस्तै, सोही दिनको राति इटहरी ५ मा रहेको चमेना खाजा घरको ११२ नं. कोठाबाट लागूऔषधको कारोबार भइरहेको भन्ने सूचनाका आधारमा जिल्ला बारा निजगढ १२ घर भइ हाल इटहरी ५ मा बसोबास गर्दै आएका २७ वर्षीय दीपक भनिने वीरेन्द्र राई, इटहरी ५ बस्ने १८ वर्षीय विवेक बस्नेत तथा अर्का एकजना नाबालक नै रहेकाले प्रहरीले तत्काल नाम नखुलाएपनि अनुसन्धानको प्रक्रिया अगाडि बढाएको केसीले बताए ।

उनीहरुको साथबाट प्रहरीले ५६ ग्राम, २०० मिलिग्राम ब्राउनसुगरसहित डिजिटल मेसिन समेत बरामद गरेको उनले जानकारी दिए । अनुसन्धान गर्ने क्रममा इटहरी ४ बस्ने २३ वर्षीय विवेक खड्कामार्फत लागूऔषध खरीद गरेकाले खड्कालाई पनि प्रहरीले पक्राउ गरेको छ । उनका अनुसार खड्काको घर खानतलासी गर्दा प्रहरीले २९ ग्राम, ८०० मिलिग्राम ब्राउनसुगर फेला पारेको छ ।

त्यस्तै, प्रहरीले आइतबार दिउँसो नाइट्रोजन ट्याब्लेटसहित दुईजनालाई पक्राउ गरेको छ । पक्राउ पर्नेमा सुनसरीको कोशी गाउँपालिका ५ बस्ने २२ वर्षीय मनिर मियाँ र इनरुवा ३ बस्ने ५७ वर्षीय नारायणप्रसाद शिवाकोटीको साथबाट गरी एक सय पत्तामा रहेको एक हजार थान लागूऔषध नाइट्रोजन ट्याब्लेट बरामद गरेको छ । साथै उनीहरुको साथबाट प्रहरीले नगद ४० हजार पाँच सय रुपैँया समेत बरामद गरेको छ ।

पक्राउ परेका आठ जनामाथि नै आइतबार जिल्ला अदालत सुनसरीबाट म्याद थप गरी अनुसन्धानको प्रक्रिया अघि बढाइएको डीएसपी केसीले जानकारी दिए । यसअघि पक्राउ परेका अन्य ६ जनाबिरुद्ध पनि लागूऔषध मुद्धामा नै म्याद थप गरी अनुसन्धान भइरहेको उनले बताए ।

‘इटहरी प्रहरीको चुनौती र समस्याको रुपमा लागूऔषधको कारोबार हो, बीचको समयमा निषेधाज्ञामा केही कम भएको थियो,’ डीएसपी केसीले टाकुरासँग भने, ‘निषेधाज्ञा खुकुलो भएसँगै छोटो अवधिमा त्यतिको संख्यामा मानिस पक्राउ पर्नु इटहरीका लागि ठूलै संख्या हो ।’

भिडियो