धरान : धरानमा लकडाउन अवधिभर वीपी कोइराला स्वास्थ्य विज्ञान प्रतिष्ठान आसपासका होटलहरुमा कडाइ गरिने भएको छ ।
बिहीबार वीपी प्रतिष्ठानका निर्देशक प्रा.डा. गौरी शंकर शाहको कार्यकक्षमा मेयर तिलक राई, उपमेयर मञ्जु भण्डारीसहित बसेको सर्वपक्षीय छलफलले प्रतिष्ठानमा कडाइ गर्ने निर्णय गरेको हो ।
इलाका प्रशासन कार्यालय धरानका प्रमुख सुवास कुमार लामिछानेले भने, ‘धरानमा ४ गतेदेखि १० दिनसम्म कडाइका साथ लकडाउन हुँदैछ, त्यसको तयारीको सिलसिलामा वीपीमा ठूलो संख्यामा बिरामीहरु आउने, उनीहरुको व्यवस्थापन गर्न, बिरामीको कुरुवाहरुलाई व्यवस्थित गर्न छलफल भयो ।’
उनका अनुसार वीपी प्रतिष्ठान अगाडि रहेका सबै होटलहरु समेत बन्द गर्ने निर्णय भएको छ । प्रतिष्ठानमा उपचार गर्न आएका बिरामी र कुरुवाहरुलाई भित्रै खानाको व्यवस्था गर्ने तयारी भएको छ । प्रतिष्ठानभित्रका क्यान्टिनहरु खुला हुनेछ ।
प्रतिष्ठानभित्र रहेका विद्यार्थी, कर्मचारीहरुलाई लकडाउनको बारेमा सुसूचित गर्न पदाधिकारीसँग छलफल गरिएको उनले जानकारी दिए ।
डेपुटी अस्पताल निर्देशक डा. दिव्यराज मिश्राले लकडाउन अवधिभर प्रतिष्ठानमा कार्यरत डाक्टर, नर्श, कर्मचारीहरुलाई आवतजावत गर्न पासको व्यवस्था गरिने छ । गत वर्ष पासको दुरुपयोग भएको कारण यसपटक रुटको आधारमा पास वितरण गरिने उनले बताए ।
प्रत्येक दिन धरानका एक सय जना मानिसहरुको पीसीआर परीक्षण गरिने निर्णय भएको छ । त्यसको लागि उपमहानगरपालिकाबाट सिफारिस ल्याउनुपर्ने छ । प्रतिष्ठानभित्र अत्यावश्यक रुपमा हिँडडुल गरिरहेको पाइएमा कार्बाही पनि गरिनेछ ।
छलफलमा अनुसन्धान अधिकृत सुकित चौधरी, ईमरजेन्सी मेडिसिन प्रमुख प्रा.डा. ज्ञानेन्द्र मल्ल, मेट्रोन नर्शिङ सेवा प्रमुख गायत्री राई, स्वास्थ्य महाशाखा प्रमुख उमेश मेहता, वडा नं. १७ का वडाध्यक्ष मनोज भट्टराई, अस्पताल प्रशासन सुपरभाईजर अशोक कुमार शाह, सशस्त्र प्रहरी नायव उपरीक्षक कृष्णकुमार श्रेष्ठ, जिल्ला ट्राफिक कार्यालयका प्रहरी निरीक्षक भुवनबाबु खड्का, नगर प्रहरी निरीक्षक विष्णु कोइरालाको उपस्थिति रहेको थियो ।
यो पनि – धरानमा भदौ ४ गतेदेखि कडा लकडाउन गर्ने निर्णय, औषधि बाहेक अन्य सबै पसल बन्द
Discussion about this post