इटहरी : नेपाल प्रेस युनियन सुनसरीले दुर्घटना बापतको रकम हस्तान्तरण गरेको छ । धरानस्थित विजयपुर एफ.एममा कार्यरत पत्रकार रमेश राई साङ्गेनलाई दुर्घटना वापतको ३५ हजार ५ सय रुपैँया आज (सोमबार) हस्तान्तरण गरिएको हो ।
सुनसरीका अग्रज पत्रकार गिरिराज आर्चाय र नेपाल पत्रकार महासंघ सुनसरीका अध्यक्ष जनकऋषि राईले संयुक्त रूपमा बीमा बापतको रकम हस्तान्तरण गरेका थिए ।
नेपाल प्रेस युनियनले प्रदेश १ का १४ वटै जिल्लाका युनियनका अध्यक्षसहित सुनसरीका ३ सय सञ्चारकर्मी गरी कुल ३ सय १४ जनाको दुर्घटना बीमा गरेको थियो । सोही अनुसार केही समय अघि दुर्घटनामा परेका पत्रकार राईको उपचारमा लागेको खर्च बापतको रकम हस्तान्तरण गरिएको हो ।
उपचारमा लागेको खर्चको बिल अनुसार युनियनको खातामा प्राप्त रकम हस्तान्तरण गरिएको नेपाल प्रेस युनियन सुनसरीका अध्यक्ष पवन अधिकारीले जानकारी दिए । पत्रकारको पेशागत र जीवन सुरक्षाका लागि अन्य रचनात्मक कार्यक्रम गर्ने योजना रहेको उनले बताए ।
कोरोना संक्रमणबाट संक्रमित भई निको हुने पत्रकारहरुको कोरोना बीमा बापतको रकम प्राप्त भएकाले केही समयमा वितरण गरिने पनि जानकारी दिए ।
यसअघि इटहरीका पत्रकार विराट गौतम (अनुपम) लाई पनि दुर्घटना बीमाकै सत्तरी हजार रुपैँया हस्तान्तरण गरिएको थियो ।
रकम हस्तान्तरणपछि अग्रज पत्रकार गिरिराज आचार्यले प्रेस युनियन सुनसरीले पत्रकारको हतहितका लागि आवाज उठाउने मात्र नभई वस्तुगत ढंगले कल्याण र सुरक्षाको क्षेत्रमा पनि काम गरेको बताए । ‘कोरोना महामारीमा कोरोना बीमा कार्यक्रम र यो दुर्घटना बीमा कार्यक्रम पत्रकारको कल्याणकारी र जीवन सुरक्षाको क्षेत्रमा महत्वपूर्ण योगदान हो ।’ आचार्यले भने ।
नेपाल पत्रकार महासंघ सुनसरीका अध्यक्ष जनकऋषि राईले दुर्घटना बीमाको रमकले अप्ठ्यारोमा परेका पत्रकारलाई राहत पुगेको बताए । युनियन सुनसरीले गरेका रचनात्मक कार्यले महासंघ सुनसरीलाई पनि काम गर्न रचनात्मक दबाब पुगेको उनको भनाई थियो ।
रकम हस्तान्तरण कार्यक्रममा प्रतिक्रिया दिँदै विजयपुर एम.एमकी निर्देशक हिमाल राईले पत्रकारहरुको सुरक्षाका लागि गरिएको दुर्घटना बीमा कार्याक्रम सकारात्मक रहेको बताइन् । यस्ता कार्यक्रमले पत्रकारहरु आफ्नो कार्यक्षेत्रमा खटिएर कामगर्न अझै उत्प्रेरित गर्ने उनको तर्क थियो ।
Discussion about this post