धरान : धरान उपमहानगरपालिका वडा नं. ४ स्थित पत्रङ्बारीका स्थानीयबासी र धरान उपमहानगरपालिकाको सहयोगमा पाँचकोठे अस्थायी प्रहरी चौकी निर्माण भएको छ ।
शनिबार (आज) आयोजित एक कार्यक्रममा मेयर तिलक राईले निर्माण सम्पन्न भएको अस्थायी प्रहरी चौकीको भवन उद्घाटन गरेका छन् ।
भवन निर्माण समितिका अध्यक्ष टंक राना मगरका अनुसार धरान उपमहानगरपालिकाको ३ लाख रुपैयाँ, स्थानीयबासीको ४ लाख ७३ हजार पाँच सय रुपैयाँ र जनसहभागिताको २ लाख ४० हजार रुपैयाँ लागतमा अस्थायी प्रहरी चौकीको भवन निर्माण कार्य सम्पन्न भएको हो । उक्त भवन निर्माणका लागि समाजसेवी सम्राट क्षेत्रीले ३ कठा १ धुर जग्गा निःशुल्क उपलब्ध गराएका थिए ।
कार्यक्रमका प्रमुख अतिथि समेत रहेका मेयर राईले जनस्तरबाट प्रहरी चौकी भवन निर्माण हुनु सराहनीय कार्य भएको बताए । राम्रो कार्यको लागि उपमहानगरपालिकाको साथ रहने प्रतिवद्धता व्यक्त गर्दै मेयर राईले जग्गा उपलब्ध गराउने व्यक्ति र स्थानीयबासीको पशंसा समेत गरे ।
इलाका प्रहरी कार्यालय धरानका डीएसपी नरेन्द्र कुँवरले प्रहरी र जनताको सम्बन्ध सुमधुन हुनुपर्ने बताए ।
कार्यक्रममा निर्माण समितिका अध्यक्ष राना मगरले अस्थायी प्रहरी चौकी आएदेखि अपराधिक घटना कम भएको जानकारी दिदै यहाँका जनताले सुरक्षाको अनुभूति गर्न पाएको बताए ।
Discussion about this post