इटहरी : गत माघ ४ गते सुनसरीको बर्जुमा आयोजित तेस्रो बर्जु महोत्सवमा भएको आगजनी तथा तोडफोडमा आयोजकले ६० लाखभन्दा बढी क्षतिपूर्ति व्यहोर्ने भएको छ ।
भोजपुरी कलाकार खेसरीलाल यादव कार्यक्रममा आउने भएपनि प्रशासनले कोभिड संक्रमणका कारण विराटनगरबाटै आउन रोक लगाएपछि आक्रोशित भीडले तोडफोड तथा आगजनी गरेको थियो ।
आयोजक समिति बर्जु सामूदायिक विकास केन्द्रका अध्यक्ष श्रवण चौधरीले अहिले आफूहरूले क्षतिपूर्ति तिर्दै आएको बताए ।
‘कलाकारलाई भारु साढे नौ लाख तिरेर बोलाएका थियौँ’, उनले भने, ‘क्षतिपूर्तिसहित कलाकारलाई नै साढे २२ लाख भारु तिर्नुपरेको छ ।’ उनका अनुसार आगजनीमा २२ लाख बराबरको गाडी तोडफोड भएकाले सो बापतको क्षतिपूर्ति तिरिएको हो ।
६ जनाको समूह रहेको अहिले आफूहरूले मिलेर क्षतिपूर्ति तिर्ने सहमति भएअनुसार दिर्तै आएको चौधरीले बताए ।
‘उठेको सबै पैसा त्यतिखेरै लुटियो, काउण्टरमै पब्लिकले लुटेको अवस्था छ,’ चौधरीले टाकुरान्यूजसँगको कुराकानीमा भने, ‘साउण्ड सिस्टमलाई १५ लाख र टेण्टलाई ६ लाख रुपैँया तिर्ने सहमति भएअनुसार तिरिरहेका छौँ ।’
टिकटबाट उठेको जम्मै रकम लुटिएका कारण आफूहरू समस्यामा परेको उनले सुनाए । दर्शकका लागि तीन सय र पाँच सयको प्रवेश शुःल्क लिएपनि कलाकार खेसरीलाललाई आउन प्रशासनले अंकुश लगाएपछि अनपेक्षित घटना हुन पुगेको चौधरीले बताए ।
अहिले आफूहरूले व्यक्तिगत रूपमै ऋण खोजेर क्षतिपूर्ति तिर्दै आएको उनले बताए । एक सय ५२ विघा क्षेत्रफलमा फैलिएर चराको मुख्य बासस्थान रहँदै आएको बर्जुतालको प्रचारप्रसार गर्न गत पुस २३ गतेबाट महोत्सव सुरु भएर माघ ४ गते समापन हुँदै थियो ।
तर, कलाकार खेसरीलाल नआएपछि आक्रोशित भीडले स्टेज तोडफोड तथा आधा दर्जन सवारीमा आगजनी गरेको थियो । घटनापछि सहायक प्रमुख जिल्ला अधिकारी आनन्द पौडेल नेतृत्वको छानबिन समितिले आगजानी तथा तोडफोडको घटना योजनाबद्ध नभइ भीडको मनोविज्ञानकै कारण भएको निष्कर्ष निकालेको थियो ।
छानबिन समितिको सदस्यमा जिल्ला प्रहरी कार्यालय सुनसरीका डीएसपी नरेन्द्रकुमार कार्की, सशस्त्र प्रहरी बल ४ नम्बर गणका डीएसपी मित्रलाल श्रेष्ठ, राष्ट्रिय अनुसन्धान जिल्ला कार्यालयका अनुसन्धान अधिकृत किरण भट्टराई र बर्जु गाउँपालिकाका प्रमुख प्रशासकीय अधिकृत प्रमोद चौधरी थिए ।
Discussion about this post