इटहरी : गत चैत १४ गते राति इटहरी उपमहानगरपालिका वडा नं. २ स्थित नवजागृति टोलमा रहेको अमित श्रेष्ठको घरको तल्लो तलामा बम बिस्फोटमा संलग्न चारजनालाई प्रहरीले पक्राउ गरी सार्वजनिक गरेको छ ।
शुक्रबार इलाका प्रहरी कार्यालय इटहरीमा पत्रकार सम्मेलन गरी घटनाका मुख्य योजनाकारसहित चारजनालाई प्रहरीले सार्वजनिक गरेको हो ।
जिल्ला प्रहरी कार्यालय सुनसरीका एसपी सञ्जयसिंह थापाका अनुसार पक्राउ पर्नेमा झापाको कन्काइ नगरपालिका ८ लक्ष्मीपुर बस्ने ४३ वर्षीय सञ्जय भनिने खगेन्द्र खरेल, इटहरी २ मै कोठाभाडामा बस्दै आएकी आशा भनिने लक्ष्मीदेवी थापा (ठकुरी), उनकै छोरा २० वर्षीय रबिन थापा र लमजुङको ढोडेनी गाउँपालिका ७ स्थायी घर भएका २३ वर्षीय शेरजङ्ग गुरुङ रहेका छन् ।
इटहरीमै माइती घर भएकी महिला ठकुरीको श्रीमान सात वर्षअघि नै कोरिया वैदेशिक रोजगारीमा जाँदा उतै मृत्यु भएको बताइएको छ ।
उनीहरूमध्ये खरेल मुख्य योजनाकार रहेको प्रहरीको प्रारम्भिक अनुसन्धानबाट खुलेको छ । उनलाई बिहीबार झापाको मेचीनगर ६ स्थित नेपाल–भारत सिमाना काकडभिट्टाबाट पक्राउ गरिएको एसपी थापाले बताए ।
पक्राउ परेकाहरूको साथमा रहेको हिमाल सुरक्षा परिषद्को पर्चा, कफन लेखिएको सदस्यता कार्ड, विभिन्न बैँकको चेक, विभिन्न ब्राण्डको मोबाइल बरामद गरिएको उनले बताए ।
पक्राउ परेकाहरूलाई सुनसरी जिल्ला अदालतबाट बम बिस्फोटन र संगठित अपराध मुद्दा शीर्षकमा म्याद थप गरी घटना सम्बन्धमा थप अनुसन्धान तथा कारबाही अगाडि बढाइएको प्रहरीले जनाएको छ ।
घटनाको प्रकृति हेर्दा उनीहरू योजनाबद्व तरिकाले लागेको, आसन्न निर्वाचनलाई त्रास पैदा गर्नका लागि पनि सुनसरीलाई टार्गेट गरिएको प्रहरीको प्रारम्भिक अनुसन्धानबाट खुलेको उनले बताए ।
खरेलको ‘ब्याकग्राण्ड’ आपराधिक गतिविधि
मुख्य योजनाकार सञ्जय भनिने खगेन्द्र खरेल यसअघि पनि विभिन्न आपराधिक गतिविधिमा संलग्न रहेको अभियोगमा जेल चलान भएको प्रहरीको प्रारम्भिक अनुसन्धानबाट खुलेको एसपी थापाले बताए ।
‘यसअघि पनि बिस्फोटक पदार्थ तथा संगठित अपराधमा संलग्न भएको अभियोगमा दुई वर्ष पाँच महिना सजाय भुक्तान गरी छुटेका रहेछन्,’ उनले भने, ‘उनी हिमाल सुरक्षा परिषद् नेपालको केन्द्रीय अध्यक्ष रहेको र घटनामा संलग्न अन्य व्यक्तिहरूको बारेमा पनि थप अनुसन्धान भइरहेको छ ।’
भारतीय आर्मी २०५५ सालमा भारतीय सेनामा भर्ती भएका उनले चार वर्ष सेवा गरेका थिए ।
‘निजको विगत हेर्दा चार वर्ष भारतीय सेनामा भर्ती भएर सेवा गरेको देखिन्छ,’ एसपी थापा भन्छन्, ‘पछिल्ला दिनमा भारतको दिल्ली, सिलगढीमा बस्दै नेपालमा विभिन्न समयमा आतङ्क सिर्जना गर्दै आएका रहेछन् ।’
प्रहरीका अनुसार गत माघ ९ गते झापाको बिर्तामोडमा र माघ १३ गते दमकस्थित शिवान चर्चमा हिमाल सुरक्षा परिषद्का पर्चाहरूसहित बिस्फोटक पदार्थ राख्नेका मुख्य नाइके खरेल नै रहेको खुलेको छ । यसअघि यही परिषद्को नाममा आतङ्क सिर्जना गर्ने ९ जनालाई प्रहरीले पक्राउ गरिसकेको छ ।
हिमाल सुरक्षा परिषदको पर्चा भर्खरै सशस्त्र युद्वको घोषणा गरेको संगठन हो । फागुन १५ गते यो सङ्गठनले एक विज्ञप्ति निकाल्दै सशस्त्र युद्धको घोषणा गरेको थियो ।
संघीयता खारेज, ५ विकास क्षेत्र कायम गरिनुपर्ने, हिन्दु राष्ट्रिय कायम गर्नुपर्ने, नागरिकता छानबिन गर्नुपर्ने, भारत–चीन सिमा विवाद समाधान गरिनुपर्ने, स्वदेशी उत्पादनलाई प्राथमिकता दिनुपर्ने, एमसीसी सम्झौता खारेज गरिनुपर्ने लगायतका मागहरू यो सङ्गठनले राख्दै सशस्त्र युद्वको घोषणा गरेको हो ।
खरेलले नेतृत्व गरेको भनिएको हिमाल सुरक्षा परिषद् नेपाल भन्ने संगठनमा राजनीतिक पृष्ठभूमि भएका व्यक्ति संलग्न नभएर वैदेशिक रोजगारी सम्बन्धी ठगी, लागूऔषध मुद्दामा जेल परेर छुटेकाहरू छन् ।
झापा, मोरङ र सुनसरीका व्यापारी व्यवसायीलाई तर्साएर चन्दा असुल्ने धन्दा चलाउने उद्देश्यले स्थानीय तहको चुनाव नजिकिँदै गर्दा चर्चमा बम विस्फोट गरी आतंक मच्चाउन खोज्दा इटहरीको आफ्नै सेल्टरमा बम विस्फोट भएको प्रहरीको भनाइ छ ।
यसअघि २०७६ वैशाख २८ गते झापाको कन्काई पुलमा समेत गोर्खा जनमुक्ति पार्टीको नाममा ग्रेटर नेपालको माग राख्दै बिस्फोटक पदार्थ तथा संगठित अपराध कसूरमा दुई वर्ष ५ महिना कैद सजाय भुक्तान गरिसकेका खरेलबारे थप अनुसन्धान भइरहेको प्रहरीले जनाएको छ ।
घटनाको अनुसन्धानमा १ नम्बर प्रदेश प्रहरी कार्यालय विराटनगर (आरआइटी), संघीय प्रहरी इकाई कार्यालय धरान, जिल्ला प्रहरी कार्यालय सुनसरी र इलाका प्रहरी कार्यालय इटहरीको संयुक्त टोली खटिएको थियो ।
(भिडियो)
यो पनि – इटहरी बम बिस्फोटमा संलग्न चारजना प्रहरीद्वारा सार्वजनिक
यो पनि – इटहरी बम बिस्फोटबारे के भन्छन् सुनसरीका एसपी ?
यो पनि – इटहरीमा बम बिस्फोट, दुईजना घाइते
Discussion about this post