इटहरी : सत्ता गठबन्धनको निर्णयलाई लत्याउँदै इटहरीमा माओबादी केन्द्रले प्रमुख–उपप्रमुखसहित सबै वडामा उमेद्वार उठाएको छ ।
गठबन्धनको निर्णयप्रति असन्तुष्टि जनाएको इटहरी माओबादीले प्रमुख–उपप्रमुखसहित सबै वडामा वडाध्यक्षको मनोनयन दर्ता गरेको हो ।
गठबन्धनले इटहरीको मेयरमा नेपाली कांग्रेस र उपमेयरमा एकीकृत समाजवादीलाई उठाउने निर्णय गरेको थियो । तर, उक्त निर्णयलाई लत्याउँदै मनोनयन गरिएको हो ।
माओवादी केन्द्रका तर्फबाट भानु मैनालीले प्रमुख पदमा र सुशीला उप्रेतीले उपप्रमुख पदमा मनोनयन दर्ता गराएका छन् ।
माओबादी केन्द्र प्रदेश १ का उपाध्यक्ष समेत रहेका शिव डाँगीका अनुसार वडा विभाजनमा पनि सहमति हुन नसक्दा सबै वडामा उमेद्वार उठाइएको हो ।
माओबादी केन्द्रबाट इटहरी २० का वडाध्यक्षको उमेद्वार समेत रहेका नवराज मैनालीले आफूहरूलाई गठबन्धनले कमजोर जस्तो सोचेका कारण सबै वडामा उमेद्वारी दिएको बताए ।
उनले भने, ‘कांग्रेसले वार्तामा नबसेका कारण र हामीलाई कमजोर सोचेको जस्तो लागेकाले सबै ठाउँमा उमेद्वारी दिएका हौँ ।’
आगामी बैशाख ३० गते हुने स्थानीय तहको निर्वाचनमा यसअघि गठबन्धनको तर्फबाट नेपाली कांग्रेसका हेमकर्ण पौडेलले मेयरमा र नेकपा एकीकृत समाजवादी पार्टीका केशबकुमार विष्टले उपमेयरमा उमेद्वारी दर्ता गराएका छन् ।
यस्तै, नेकपा एमालेलेल यामकुमार सुब्बाले मेयर र सङ्गीता चौधरीले उपमेयरमा उमेद्वारी दर्ता गराएका छन् ।
Discussion about this post