इटहरी : इटहरी उपमहानगरपालिका वडा नं. १९ मा दुर्गाप्रसाद पौडेल पुनः वडाध्यक्षको चुनावी प्रतिष्पर्धामा छन् ।
यसपटक इटहरी १९ मा रोचक प्रतिष्पर्धा हुने भएको छ । नेपाली कांग्रेसबाट वडाध्यक्षमा पुनः पौडेल नै वडाध्यक्षको उम्मेदवार छन् भने नेकपा एमालेबाट यसअघिका वडाध्यक्ष समेत रहेका श्रीनारायण चौधरी चुनावी मैदानमा छन् ।
०७४ को स्थानीय निर्वाचनमा चौधरीसँग ४ मतले पराजित भएका पौडेल यसपटक चुनाव जित्ने रणनीतिमा छन् । विभिन्न सामाजिक संस्थामा नेतृत्वदायी भूमिका निर्वाह गरेका पौडेल इटहरी १९ का लोकप्रिय नेताका रूपमा चिनिन्छन् ।
‘अघिल्लो पटक जनतासमक्ष प्रत्यक्ष जोडिएर काम गर्न पाइएन, चुनावमा पराजित भएपनि जनताकै सेवामा समर्पित छु,’ पौडेल भन्छन्, ‘कोरोनाको समयमा जनतालाई आवश्यक परेको समयमा जुनसुकै समयमा स्वास्थ्य सामाग्रीसहित हरेक ठाउँमा पुगेको छु, यसपटक यहाँका जनताले कामको मूल्याङ्कन गर्नुहुनेछ ।’
उनले यसअघि नेकपा एमालेको घोषणापत्रमा उल्लेख भएमध्येका ३० प्रतिशत पनि काम नभएको आरोप लगाउँदै यसपटक आफूले चुनाव जित्ने दाबी गरे ।
‘अहिले यहाँका सामुदायिक विद्यालयको स्तर उक्सन सकेको छैन, बजेट अभावले पठनपाठन नै नभइरहेको अवस्था पनि छ,’ उनले भने, ‘निजी विद्यालय सो सरहको गुणस्तर र कक्षा १२ सम्म निःशुल्क अध्यापनका लागि मैले पहल गर्नेछु ।’
उनले आफूले चुनाव जितेको अवस्थामा यहाँका गरिब, विपन्न, पीडित र सर्वहारा नागरिकका लागि निःशुल्क अध्यापन गराउने प्रतिवद्वता व्यक्त गरे ।
इटहरी १९ भित्री गाउँ भएकै कारण सबै ठाउँमा बाटो नबनेकाले पनि समस्या निम्तिरहेको समयमा आफूले सडक कालोपत्रेदेखि खानेपानी समस्यालाई निरुपण दिने उनको दाबी छ ।
‘प्रशासनिक काममा छिटो, छरितो, चुस्त, दुरुस्त सँगै लेखापढीको काम निःशुल्क गर्ने मेरो प्रतिवद्वता छ,’ उनी भन्छन्, ‘यहाँका चौधरी समुदायको ग्रामथानको स्तरोन्नतिका लागि पनि आवश्यक बजेट बिनियोजन गरी बुद्विजीवीहरूसँगको सहकार्यमा काम गर्नेछु ।’
उनले इटहरी १९ मा बाढीको समस्या रहेकाले शेरा खोलाको तटबन्धनका निम्ति विशेष पहल गर्ने बताउँदै भने, ‘शेरा खोलाले भवानीपुरको शिरमा क्षति पु¥याइरहेको छ, यसलाई ड्रेन उठाएर नियन्त्रण गर्ने काममा मेरो पहिलो प्राथमिकता रहन्छ, बाढीबाट हुने क्षतिलाई न्यूनीकरण गर्नका लागि विशेष पहल गर्नेछु ।’
उनले भवानीपुर सिमसार पार्कदेखि देवीथानसम्म पर्यटकीय क्षेत्रको रूपमा विकास गर्ने प्रतिवद्वता व्यक्त गरे । अहिले आम मानिस शिक्षित भएका कारण यसपटक हाम्रो भन्दा पनि राम्रो मानिसलाई मत दिने उनको विश्वास छ ।
यस्तो छ पौडेलको पृष्ठभूमि
२०३६ मंसिर १३ गते साबिकको हाँसपोसा गाविसमा जन्मिएका उनले स्नातक उत्तीर्ण गरेका छन् ।
२०५४ सालदेखि नेविसंघबाट राजनीतिको यात्रा सुरु गरेका उनी हाल नेपाली कांग्रेस इटहरी १९ को सभापति छन् । कांग्रेसको १३ र १४ औँ महाधिवेशनमा वडासभापतिमा निर्वाचित भएका पौडेलले थुप्रै सामाजिक संघसंस्थामा योगदान पुर्याएका छन् ।
लायन्स क्लब अफ तरहराको अध्यक्ष, रेडक्रस हाँसपोसा उपशाखाको कोषाध्यक्ष, भवानीपुर सामुदायिक बनको उपाध्यक्ष भएर काम गरेको उनको अनुभव छ । विभिन्न सामाजिक संस्थामा रहँदा यहाँका विद्यालयहरूमा शैक्षिक सामाग्री वितरण, स्वास्थ्य सामाग्री वितरण, वृक्षारोपण जस्ता काममा अग्रसर भएका पौडेलले स्वास्थ्य शिविर सञ्चालन गरेर पनि जनताको प्रत्यक्ष सेवा गरेका छन् ।
कोरोनाकालमा आफैँले पीपीई लगाएर सेनिटाइजर, स्वास्थ्य सामाग्री वितरण, अक्सिजन अभाव हुँदा अक्सिजन वितरण जस्ता काममा अगुवाई गरेका पौडेल यसपटकको चुनाव जित्ने विश्वासमा छन् ।
स‘मस्या परेको बेला वडा कहाँ थियो भनेर खोज्नुपर्ने अवस्था थियो, जहाँ वडा पुगेको छैन, त्यहाँ मैले पुगेर सेवा गरेको छु, उनले भने, ‘तीनै कामको मूल्याङ्कन गरेर यसपटक मलाई यहाँका जनताले मत दिनुहुनेछ ।’
पौडेलको प्यानलमा खुल्ला सदस्यमा दीपक पुरी, रञ्जित कार्की, महिला वडा सदस्यमा नौमति राई र दलित महिला सदस्यमा कमला दर्जी चुनावी मैदानमा छन् ।
Discussion about this post