इटहरी : स्थानीय सरकार आएको करीब नौ महिना बित्यो ।
यसैबीच इटहरी उपमहानगरपालिकामा निर्वाचित भएर आएका जनप्रतिनिधिले के काम गरे, कसरी काम गरिरहेछन् र अबका योजना के छन् भन्नेबारे संक्षिप्तमा चर्चा गरिएको छ ।
इटहरी उपमहानगरपालिकामा निर्वाचित भएर आएकी उप–प्रमुख संगीता कुमारी चौधरीले आँफू निर्वाचित भएर आएबित्तिकै बजेट निर्माणमा सक्रिय भएको बताउँछिन् । उनले आँफूले सोचे अनुरुप काम गर्न नसकेको स्वीकार गर्दैै अहिले विकास निर्माणकै काम भइरहेको बताइन् ।
‘हामीले सुरुआती दिनमा जुन जोश, जाँगर लिएर आएका थियौँ, सोचे अनुरुप काम भएको छैन,’ उनले भनिन्, ‘चाहेजस्तो काम गर्न नसकिएकै हो, अब जनतासँग प्रत्यक्ष जोडिएर विकास निर्माणका काममा सहकार्य गर्छौँ ।’
उनले आँफू धेरै जाँगर लिएर आएपनि यहाँ आएपछि सोचेजस्तो नभएको बताइन् ।
उनले उप–प्रमुखको काम धेरै हुने भएकाले आँफू अझै सिक्ने क्रममा रहेको बताइन् । ‘हामी अझैपनि सिक्ने क्रममै छौँ, उपमेयरको काम धेरै हुँदोरहेछ,’ चौधरी भन्छिन्, ‘योजना अनुगमन, बजार अनुगमन, न्यायिक समितिका कुरा उपमेयरले नै हेर्नुपर्ने हुँदा सिकाइको क्रम पनि छ ।’
कतिपय सर्वसाधारणले दसैँको समयमा मात्रै बजार अनुगमन गर्ने गरेको गुनासो गरेकाले आँफूले नियमितजस्तो अनुगमन गरिरहेको चौधरी सुनाउँछिन् । बजार अनुगमनका क्रममा समयावधि सकिएका सामान बिक्री गर्ने व्यवसायीलाई कानुनी कारबाही पनि गर्ने गरेको उनले बताइन् ।
उनले न्यायिक समितिमा दैनिक १० जना भन्दा बढी मानिसहरू आउने सुनाइन् । स्थानीय सरकार सञ्चालन ऐन अनुसार स्थानीय सरकारले १३ वटा मुद्दामा फैसला गर्न पाउने भएकाले न्यायिक क्षेत्रमा नगरका धेरैजसो मानिसहरू आउने गरेको उनले बताइन् ।
‘जगा किचलो, लेनदेन, सापटी लिएको, सम्बन्ध बिच्छेदका कुरा हामीकहाँ दैनिकजसो आइरहेका छन्,’ चौधरी भन्छिन्, ‘घरायसी समस्याका कुरा पनि आउँछन्, हामीले सकेसम्म मेलमिलाप गराएरै पठाएका छौँ ।’
उनले अहिले उपमेयर आत्मनिर्भर कार्यक्रम अन्तर्गत सीप सिकाउने र तालिम दिने काम पनि सुरु गर्न लागिएको बताइन् । यस्तै, इटहरीमा रहेका १२८ वटा सहकारीमा अनुगमन गर्ने काम पनि भइरहेको चौधरी बताउँछिन् ।
‘सहकारीको सवालमा कार्यक्षेत्रभित्र कार्यालय नपाइएको, समयमा अडिट नभएको, एक सहकारी, एक सीप लागू नभएको पाइन्छ,’ उनले भनिन्, ‘व्यवस्थापक समितिले राम्ररी काम नगरिराखेको अवस्था पनि छ, हामी थप अनुगमन र नियमन गरिरहेका छौँ ।’
उनले कतिपय सहकारीहरू नियम, कानुनमा नरहेका कारण पनि अनुगमन तीव्र रूपमा भइरहेको बताउँदै पदीय दुरुपयोग गर्ने सहकारीहरूलाई पनि नियमन गरिने बताइन् ।
मेयर सा’बसँग काम गर्न कति सहज छ भन्ने जिज्ञासामा चौधरी भन्छिन्, ‘हरेक विषयवस्तुमा समन्वय र सहकार्य भइरहेको छ, काम गर्नका लागि अहिलेसम्म असहज भएको छैन ।’
विकास निर्माणका काममा सहकार्य भइरहेको र अब नगरको विकासका लागि आँफूहरूले छलफल गरिरहेको उनले बताइन् । अबको नगरसभापछि नगर क्षेत्रको विकासका लागि आँफूहरू गम्भीर हुने उनको भनाइ छ ।
Discussion about this post