इटहरी : इटहरी ६ मा रहेको मोर्डन प्रिपेरेटोरी इङ्लिस स्कुलमा विद्यार्थीहरूले आफ्ना प्रतिभा प्रस्फुटन गरेका छन् ।
आइतबार (आज) एक समारोहबीच विद्यालयमा अध्ययनरत विद्यार्थीहरूले आँफूमा भएका अन्तरनिहीत क्षमता प्रस्तुत गरेका हुन् ।
कार्यक्रममा विद्यार्थीहरूले विज्ञान प्रदर्शनी, फुड फेस्टिबल, हस्तकला प्रदर्शनी र मोर्डन सिंगिङ स्टार कार्यक्रमको आयोजना गरिएको थियो । विद्यार्थीहरूले आँफैले बनाएका खानेकुरासहित विज्ञान र हस्तकला प्रदर्शनी गरिएको हो ।
यस्तै, मोर्डन सिंगिङ स्टार अन्तरगत भएको कार्यक्रममा कक्षा ९ मा अध्ययनरत उज्वल निरौला प्रथम भएका छन् । यस्तै, कक्षा ५ मा अध्ययनरत मीनाक्षी अधिकारी द्वितीय र कक्षा ९ मा अध्ययनरत श्यामल मोक्तान तृतीय भएका छन् ।
उनीहरू पहिला छनौट भएर टप ५ भित्र आएका थिए । जसमध्ये उत्कृष्ट भएका ती विद्यार्थीहरूलाई पुरस्कृत समेत गरिएको छ ।
‘अध्ययन भनेको पाठ्यक्रम मात्रै होइन, त्यो बाहेक बाहिरी कुरा पनि सिक्नुपर्छ भन्ने उदेश्यले यो कार्यक्रमको आयोजना गरिएको हो,’ विद्यालय सञ्चालक समितिका अध्यक्ष सञ्जीव वाग्लेले भने, ‘एउटा उत्सवको रूपमा यो कार्यक्रम आयोजना गरिएको हो, यसअघि पनि विद्यार्थीहरूको क्षमता अभिवृद्विका लागि विविध कार्यक्रमको आयोजना गरिदैँ आइको छ ।’
उनका अनुसार विद्यालयले पाठ्यक्रममा भएका किताबी कुरामात्रै भन्दा पनि व्यवहारिक शिक्षामा जोड दिँदै आएको छ ।
उनले भने, ‘किताबी कुराले कक्षामा उत्तीर्ण गर्नका लागि सहज हुन्छ, तर व्यवहारिक ज्ञानले जीवन निर्वाहका लागि सहज हुने भएकाले हामीले व्यवहारिक ज्ञानलाई प्राथमिकता दिँदै आएका छौँ ।’
कार्यक्रमका प्रमुख अतिथि वीपी कोइराला स्वास्थ्य विज्ञान प्रतिष्ठानका हाडर्जोनी विशेषज्ञ डा. पशुपती चौधरीले विद्यालयले यो किसिमको कार्यक्रम आयोजना गर्नु सकारात्मक रहेको बताए । उनले विद्यार्थीमा भएको क्षमता आफ्ना अभिभावका अगाडि प्रस्तुत गर्दा पनि विद्यार्थीलाई प्रोत्साहन हुने बताए ।
उनले भने, ‘विद्यार्थीहरूले आफ्ना अभिभावकका अगाडि गायन, नृत्य तथा विभिन्न रचनात्मक गतिविधि गर्दा उनीहरूमा हौसला पुग्छ, सो कारणले किताबी ज्ञानसँगै व्यवहारिक ज्ञान पनि बढ्छ ।’
यो किसिमको कार्यक्रम आयोजना गरेकोमा डा. चौधरीले विद्यालय परिवारलाई शुभकामना दिए ।
कार्यक्रममा सोही विद्यालयका पूर्व विद्यार्थी तथा नेपाल सरकारका अधिकृत सुधीर साफीले विद्यार्थीमा भएका रचनात्मक कुरा प्रस्तुत गर्ने सकारात्मक माध्यम उक्त कार्यक्रम भएको बताए ।
उनले भने, ‘यस्ता किसिमका कार्यक्रमले विद्यार्थीहरूको संर्वाङ्गीण विकासमा सहयोग पुग्छ, यसले पनि यस्ता कार्यक्रम आवश्यक देखिन्छ ।’
विद्यालयका प्रधानाध्यापक भीम श्रेष्ठले कक्षामा सिकेका ज्ञान व्यवहारिक रूपमा उतार्नका निम्ति यो किसिमको कार्यक्रम आयोजना गरिएको बताए ।
‘कक्षामा सिकेका ज्ञानलाई व्यवहारिक रूपमा उतार्न र व्यवहारिक ज्ञानलाई प्रयोगमा ल्याउनका निम्ति यो कार्यक्रमको आयोजना गरिएको हो,’ उनले भने, ‘आगामी दिनमा पनि विद्यार्थीहरूको अन्तरनिहीत क्षमतालाई अभिभावकसामु पुर्याउनका निम्ति रचनात्मक कार्यक्रमको आयोजना गर्नेछौँ ।’
Discussion about this post