इटहरी : इटहरीको जनता बहुमुखी क्याम्पसको स्वतन्त्र विद्यार्थी युनियन (स्ववियु) सभापतिमा नेपाल विद्यार्थी संघ (नेविसंघ) का सहदेव काफ्ले निर्वाचित भएका छन् ।
सुनसरीको सबैभन्दा बढी विद्यार्थी भएको उक्त क्याम्पसको स्ववियु सभापतिमा नेपाल विद्यार्थी संघका इकाई सभापति समेत रहेका काफ्ले निर्वाचित भएका छन् ।
आइतबार भएको निर्वाचनमा कूल ५,७७८ मतदातामध्ये २,४२४ मत खसेको थियो । सोमबार दिउँसोबाट सुरु भएको मतगणनाको अन्तिम मतपरिणाम मंगलबार बिहान ३ बजेतिर आएको छ । अन्तिम मत परिणामअनुसार काफ्लेले एक हजार २९८ मत प्राप्त गर्दै विजयी भए । काफ्लेलाई समाजवादी विद्यार्थी युनियनको साथ थियो ।
उनका निकटतम प्रतिद्धन्दी अनेरास्ववियुका उज्वल सिग्देलले ६८२ मत प्राप्त गरे । यस्तै, स्वतन्त्र उम्मेदवारी दिएका दानबीर थापा (सम्राट) ले २८५ मत प्राप्त गरेका छन् ।
को हुन् काफ्ले ?
बि.सं. २०५२ मंसिर १४ गते भोजपुरको हसनपुरमा जन्मिएका काफ्ले ११ वर्षको उमेरदेखि नै राजनीतिमा चासो राख्थे ।
उनी २०६२।०६३ सालको जनआन्दोलनताकै सक्रिय रहे । कलिलो उमेरमै निबन्ध लेखन, साहित्यिक गतिविधिमा सक्रियता, वक्तित्वकला, नेतृत्व विकास तथा क्षमता अभिवृद्वि लगायतका कार्यक्रममा उनको सहभागिता हुन्थ्यो ।
०६४ सालमा भोजपुरबाट सुनसरीको तत्कालीन भरौल गाबिसस्थि कालाबञ्जारमा बसाइसराईँ आएपछि उनी स्थानीय भरौल बाल सञ्जालको अध्यक्ष बने । यस्तै,०६८ सालमा नेविसंघ जडेज माविका इकाई सभापतिको कार्यभार सम्हालिसकेका काफ्ले निरन्तर विद्यार्थी राजनीतिमा सक्रिय छन् ।
खासगरी इटहरीको जनता बहुमुखी क्याम्पसमा २०७१ सालमा भर्ना भएपछि उनमा विद्यार्थी राजनीतिको चाख बढ्दै गयो ।
सोही अनुरूप ०७१ सालमा जनता बहुमुखी क्याम्पस प्रवेश गरी नेविसंघको इकाई समिति सदस्य भइ २०७३ मा इकाई सचिव भएका उनी विद्यार्थीका हरेक समस्याको सारथी बन्दै आएका छन् ।
विद्यार्थीलाई लिनका लागि बिहानको समयमा बस नपुगेका स्थानमा क्याम्पसको बस पु¥याउन उनको योगदान महत्वपूर्ण छ । बस नआएका ठाउँमा विद्यार्थीले काफ्लेलाई नै सम्झन्छन् ।
विद्यार्थीका समस्या आउनेबित्तिकै काफ्ले अडिग भएर उनीहरूका समस्यासँग नजिक रहेर काम गर्दै आएका छन् ।
०७४ सालमा जनता बहुमुखी युवा रेडक्रस सर्कलको सभापति भएसँगै प्राथमिक उपचारको व्यवस्था गर्ने कार्यको प्रवन्ध र नेपालको सबैभन्दा ठूलो रेडक्रसमार्फत विपद् व्यवस्थापनको कार्यक्रम समेत आयोजना गरिसकेका काफ्ले अहिले नेविसंघ जनता बहुमुखी क्याम्पसको इकाई सभापति छन् ।
उनी विद्यार्थीमाझ मात्रै होइन, प्राध्यापकसँग पनि उत्तिकै परिचित र नजिक छन् । उनलाई प्राध्यापकहरूले समेत अनुशासित र कर्तव्यनिष्ट विद्यार्थीका रूपमा रुचाउँदै आएका छन् ।
बिहान क्याम्पसमा अध्ययन र विद्यार्थीका समस्यासँगै काम गर्दै आएका उनी दिउँसो भने अध्यापन पेशामा सक्रिय छन् । दिनभर उनी इटहरीको एक निजी विद्यालयमा अध्यापन गराउँदै आएका छन् ।
खासगरी क्याम्पसमा छात्राहरूका लागि निःशुल्क सेनेटरी प्याडको व्यवस्था मिलाएका काफ्लेको तीखो र लोभलाग्दो भाषणले विद्यार्थीहरू उनीसँग प्रभावित हुँदै आएका छन् ।
स्नातकोत्तर अध्ययन गरिसकेका काफ्लेले क्याम्पसमा भएका बेथितिहरूका विरुद्व विद्यार्थीमाझै रहेर नेतृत्व लिदैँ आएका छन् ।
व्यवहारिक र प्रयोगात्मक शिक्षाको अबलम्बन गर्न गराउन आवाज उठाइरहेका उनी स्ववियु सभापतिमा निर्वाचित भइसकेपछि आँफू निरन्तर नडगमगाइकन विद्यार्थीको पक्षमा काम गर्ने बताउँछन् ।
‘स्ववियु सबै विद्यार्थीको साझा थलो भएका कारण मेरो नेतृत्वले कसैलाई विभेद नगरी काम गर्नेछ,’ काफ्ले भन्छन्, ‘मैले विगतमा गरेका राम्रा कामकै कारण विद्यार्थीहरूले मलाई मत दिएर जिताउनुभएको छ, अब मेरो काँधमा विद्यार्थीका पक्षमा काम गर्ने चुनौतीसँगै जिम्मेवारी थपिएको छ ।’
यसअघिको स्ववियुले विद्यार्थीको पक्षमा काम गर्न नसेकपनि आँफू निरन्तर विद्यार्थीकै पक्षमा काम गर्ने उनको भनाइ छ ।
उनले भने, ‘हामीले कामै गर्न नसक्ने एजेन्डा बाँडेका छैनौँ, काम गर्न सक्ने र स–साना समस्या सम्बोधन हुनेगरी काम गर्छौँ ।’
पारिवारिक पृष्ठभूमी राजनीति नै
काफ्लेको पारिवारिक पृष्ठभूमी पनि राजनीतिक नै रहेको छ । उनका जेठा दाजु रोहित काफ्ले बराहक्षेत्र नगरपालिका वडा नं. ५ का वडाध्यक्ष छन् ।
बराहक्षेत्र ५ स्थायी घर भएका सहदेवका दाजु रोहितले यसअघि कहिल्यै कांग्रेसले नजितेको उक्त वडामा गत स्थानीय तहको निर्वाचनमा जितेका थिए ।
अन्य सदस्य नेकपा एमालेले जितेपनि वडाध्यक्ष भने काफ्लेले जित्दै वडाको नेतृत्व गरेका छन् । पारिवारिक पृष्ठभूमी पनि राजनीतिक नै रहेका कारण काफ्लेलाई विद्यार्थी राजनीति गर्न सहज भएको बताइन्छ ।
यता, नेविसंघ सुनसरीका सभापति प्रमोद भट्टराई भन्छन्, ‘जिल्लाका सबै इकाई सभापतिमध्ये सबैभन्दा बढी अनुशासित र दक्ष विद्यार्थी भएकै कारण सहदेवको यो जित भएको हो ।’
काफ्लेको बोल्ने कला क्षमतावान भएको र विद्यार्थीमाझ नजिकबाट घुलमिल भएका कारण स्ववियु सभापतिमा जित निकालिएको भट्टराईले बताए ।
‘अब विद्यार्थीका सामान्य समस्यालाई पनि निराकारण गर्न सहदेवको नेतृत्व महत्वपूर्ण हुन्छ,’ भट्टराईले भने, ‘हिजोका दिनमा विद्यार्थीलाई समस्या पर्दा सम्झदैँ आएको एक्लो नाम सहदेव नभई अब अब स्ववियुले नेतृत्व लिन्छ ।’
Discussion about this post