इटहरी : इटहरी उपमहानगरपालिकाको नगरसभाको विषयमा विवाद भएपछि नेकपा एमालेबाट निर्वाचित जनप्रतिनिधिहरूले पत्रकार सम्मेलन गर्दै मेयरबाट लाञ्छना लगाउने काम भएको आरोप लगाएका छन् ।
गत चैत ३ गते तोकिएको १२ औँ नगरसभा बस्न नसकिएपछि एमालेबाट निर्वाचित जनप्रतिनिधिहरूले शुक्रबार (आज) पत्रकार सम्मेलन गर्दै मेयरबाट अहङ्कारपूर्ण व्यवहार भएको आरोप लगाएका हुन् ।
इटहरी ३ का वडाध्यक्ष उमेश सुवेदीले मेयर हेमकर्ण पौडेलले आँफूहरूको दलप्रति लाञ्छना लगाएको र अहङ्कारपूर्ण व्यवहार गरेको आरोप लगाए ।
‘हामी छलफलमा थियौँ, हामीले सभा बहिष्कारको शब्द नै निकालेका थिएनौँ, तर मेयरबाट अचानक सभा सुरु भएर स्थगनको कुरा आयो,’ सुवेदीले भने, ‘हामी १० मिनेटमै आउछौँ भनेर मेयरलाई अनुरोध गरेपनि उहाँले हतारहतार सभा सुरु गरेर अनिश्चितकालका लागि स्थगन गर्नुभयो र उल्टै हाम्रो दलमाथि आरोप लगाइयो ।’
एमालेबाट निर्वाचित उपमेयरसहितका वडाध्यक्षहरूले पत्रकार सम्मेलन गर्दै मेयर पौडेलले अहङ्कारपूर्ण व्यवहार गरेको र आँफूहरूमाथि हुँदै नभएको लाञ्छना लगाइएको बताएका थिए ।
पत्रकार सम्मेलनमा उपमेयर संगीता चौधरीले भने बोल्न मानिनन् । पत्रकारहरूले पटकपटक बोल्न आग्रह गरेपनि आँफू बिसञ्चो भएको भन्दै उनले बोल्न नमानेकी हुन् । पत्रकार सम्मेलनको विषयमा उनी आफैँ बेखबर भएजस्तो देखिन्थिन् । तर, वडाध्यक्षहरूले भने मेयरको चर्को आलोचना गरेका छन् ।
वडाध्यक्ष सुवेदीले मेयर पौडेलबाट एमाले दलप्रति ‘बहुमतको दम्भ’ को लाञ्छना लगाइएको समेत बताए ।
‘हामी कसैले पनि कुनै किसिमबाट सभा बहिष्कारको कुरा गरेकै थिएनौँ,’ उनले भने, ‘तर उल्टै एमालेको आदेशमा सभा बहिष्कार गरेका जस्ता आधारहीन, तथ्यहीन र भ्रामक कुरा सामाजिक सञ्जालमार्फत आएपछि हाम्रो ध्यानाकर्षण भएको हो ।’
इटहरी ९ का वडाध्यक्ष जीतेन थापाले भने विगतमा इटहरी सरकारले निमम विपरीत केही त्रुटी तथा काम गरेपनि आँफूहरूले लचकता देखाएको बताए ।
‘हामीले इटहरी सरकार सञ्चालन हुनुपर्छ भनेर विगतमा अवरोध गरेनौँ,’ थापाले भने, ‘नियम विपरीतका केही काम हुँदा कतिपय ठाउँमा आँखा चिम्लिएका हौँ, लचकता देखाएकै हो, तर हामीमाथि उल्टै आक्षेप लगाइयो ।’
कर्मचारी भत्ता कटौतीको कुरामा विगतको सरकारले चार हजार दिदैँ आएको र अहिले नयाँ जनप्रतिनिध आइकन जम्मा एक हजार मात्रै बढाइएको उनको जिकिर छ ।
‘यसअघि हरेक महिना हुँदै आएको कार्यपालिका बैठक दुई महिनामा बस्यो, भोलि नगरसभा छ आज कार्यपालिका बैठक बोलाएर हुन्छ,’ उनले भने, ‘एउटा विधि, पद्वति र प्रक्रियामा जानुपर्छ भन्ने हाम्रो कुरा हो, कर्मचारी भत्ताको कुरामा केही अप्रिय निर्णय भएको होइन जम्मा एक हजार नै त बढेको थियो ।’
इटहरी १६ का वडाध्यक्ष प्रभात आचार्यले भने नगरसभा अनिश्चितकालका लागि रोक्नु निन्दनीय भएको बताए । उनले तत्काल सभा सुरु हुनुपर्ने माग राखे । ‘हामीले तत्काल नगरसभा सुचारु गर्न मेयरसमक्ष अनुरोध गर्छौँ,’ उनले भने, ‘होइन भने हामी बहुमत भएकाले विधिअनुसार नयाँ प्रक्रियामा जान्छौँ ।’
विगतमा उपमहानगरले विज्ञ नियुक्त गर्ने कुरामा एमालेको असहमति रहेपनि आँफूहरूलाई झुक्याएको उनको भनाइ छ । यद्यपि, इटहरी उपमहानगरमा भने दलीय भागबण्डाका आधारमा विभिन्न शीर्षकमा विज्ञ नियुक्त गरिएको कतिपयको भनाइ छ ।
नगरसभामा ५ वटा विधेयक पारित गर्ने कार्यसूची थियो । ती विधेयकमध्ये कर्मचारीले मासिक रूपमा पाउँदै आएको कर्मचारीको खाजा भत्ता र इन्धन सुविधा कटौती गर्ने सम्बन्धी बिधेयक पारित गर्ने कार्यसूचीलाई लिएर एमालेबाट निर्वाचित जनप्रतिनिधिले नगरसभा बहिष्कार गरेको मेयर पौडेलले आरोप लगाएका थिए ।
प्रशासनिक खर्च घटाउनका लागि उपपमहानगरपालिकाले कर्मचारीले पाउँदै आएको मासिक पाँच हजार रुपैयाँ खाजा भत्ता र १५ लिटर इन्धन सुविधा कटौतीको निर्णय गत २६ फागुनमा बसेको उपमहानगरपालिका कार्यपालिकाको १२८ औ कार्यपालिका बैठकले निणर्य गरेको थियो ।
तर, तोकिएको समयमा मेयरसहित नेपाली कांग्रेसबाट निर्वाचित जनप्रतिनिधिहरू हलभित्र प्रवेश गरेपनि एमालेबाट निर्वाचित भएका जनप्रतिनिधिहरू नआएपछि नगरसभा अनिश्चितकालका लागि स्थगित गर्नुपरेको पौडेलले बताएका थिए ।
Discussion about this post