मोरङ : मोरङको जहदा गाउँपालिका र सुनवर्षी नगरपालिकाबाट बुधबार एकैदिन १८ जना फरार प्रतिवादीलाई प्रहरीले पक्राउ गरेको छ ।
इलाका प्रहरी कार्यालय रंगेलीबाट प्रहरी निरीक्षक चन्द्रबहादुर खड्काको नेतृत्वमा खटिएको टोलीले लुटपाट र कुटपिट मुद्दाका फरार प्रतिवादीलाई पक्राउ गरेको हो ।
मुद्दामा अदालतले दोषी ठहर गर्दै न्यून जरिवाना गरेको भए पनि त्यसवापतको रकम भुक्तानी नगरिकन उनीहरु लामो समयदेखि फरार थिए । पक्राउ पर्नेमा ११ जना लुटपाट र ७ जना कुटपिट मुद्दाका प्रतिवादी छन् ।
मोरङ प्रहरीका प्रवक्ता डीएसपी रन्जनकुमार दाहालका अनुसार अदालतले न्यून जरिवाना गरेको भएपनि भुक्तान नगरिकन भागिरहेका उनीहरूलाई लुकिछिपी बसेको अवस्थामा गाउँघरबाटै पक्राउ गरिएको हो ।
जिल्ला अदालत मोरङले लुटपाट मुद्दाका प्रतिवादीलाई २०७१ साल चैत २७ गते र कुटपिट मुद्दाका प्रतिवादीलाई २०७५ साल कात्तिक १८ गते जरिवानाको फैसला गरेको दाहालले बताए ।
Discussion about this post