इटहरी : कोसी प्रदेश सरकारको मुख्यमन्त्रीका लागि दाबी पेस गरेका नेकपा माओवादी केन्द्र संसदीय दलका नेता इन्द्रबहादुर आङ्बोले नेपाली कांग्रेसको कुनै गुटसँग नभइ कांंग्रेस पार्टीसँग गठबन्धन गरेको बताएका छन् ।
माओबादीले धेरै त्याग गर्दै कांग्रेसलाई सरकार बनाउन सघाएको तर कांग्रेसको गुट, उपगुटले भने धोका दिएको उनको भनाइ छ ।
तत्कालीन सभामुख बाबुराम गौतमलाई राजीनामा गराएर कांग्रेसका उद्धव थापालाई मुख्यमन्त्री बन्न सघाएको उनले बताएका छन् ।
दुईपटक मुख्यमन्त्री बनेपनि कांग्रेसका उद्धव थापाले विश्वासको मत प्राप्त गर्न नसकेपछि यसपटक भने प्रधानमन्त्री निवास बालुवाटारमा बसेको सत्ता गठबन्धनको बैठकले आङ्बोलाई मुख्यमन्त्री बनाउने निर्णय गरेको थियो ।
तर, कांग्रेसका डा. शेखर कोइराला समूहले असन्तुष्ट जनाउँदै मुख्यमन्त्रीमा केदार कार्कीले एमालेको साथ लिएर दाबी पेस गरे । सोअनुसार शनिबार कार्कीलाई प्रदेश प्रमुख परशुराम खापुङले मुख्यमन्त्रीमा नियुक्त गरिसकेका छन् ।
यसपटक कोशीमा सरकार बनाउने अन्तिम मौका थियो । संविधानको धारा १६८ को उपधारा ५ बमोजिम जुनसुकै सांसदले पनि मुख्यमन्त्रीमा दाबी गर्न पाउँथे । सोहीअनुसार कार्कीले केन्द्रले गरेको निर्णयलाई लत्याउँदै एमालेको साथ र डा. शेखर समूहका ९ सांसदको समर्थनमा मुख्यमन्त्रीमा दाबी पेस गरेका थिए ।
एमालेसँगको गठबन्धनबाट बाहिरिएपछि आफैँले दाबी नगरीकन कांग्रेसलाई मुख्यमन्त्री बन्न सघाएको आङ्बोले उदृत गरे ।
‘गठबन्धनको कठिन अंकगणितको बाबजुत बहुमत पु¥याउने र विश्वासको मत पनि पाउने विश्वासिलो आधार हाम्रो दलसँग हुँदापनि गठबन्धनको संवेदनशीलतालाई ख्यालमा राख्दै मुख्यमन्त्रीमा हामीले कांग्रेसको दाबीलाई स्वीकार गरेका थियौँ,’ उनले सामाजिक सञ्जालमा लेखेका छन्, ‘पहिलोपटक सरकार गठनमा कांग्रेसका उम्मेदवारलाई सभामुखको हस्ताक्षरसहित मुख्यमन्त्रीको दाबी गर्न पनि हामी तयार भयौं । मुख्यमन्त्रीको नियुक्ति सर्वोच्चले बदर गरेपछि कांग्रेसकै नेतालाई मुख्यमन्त्री बनाउन माओवादीसँग भएको सभामुखसमेत राजीनामा गराएर बहुमतसहित सरकार गठन गर्न तयार भयौं ।’
दुईपटकसम्म कांग्रेसले बहुमत प्राप्त गर्न नसकेपछि यसपटक आँफूले विश्वासको मत प्राप्त गर्नेगरी र प्रदेशलाई स्थायित्व दिन दाबी गरेपनि कांग्रेसको गुटबाट धोका पाएको उनले उल्लेख गरेका छन् । आँफूहरूले कुनै गुट, उपगुटसँग सहकार्य गरेको नभइ कांग्रेससँग सहकार्य गरेको आङ्बोले स्मरण गरे ।
‘हामीले गठबन्धन र सत्ता सहकार्य कांग्रेससँग गरेको हो । गुट, उपगुट र पार्टीभित्रको असन्तुष्टि व्यवस्थापनको जिम्मा स्वयम् कांग्रेसकै हो । पार्टीको आधिकारिक निर्णय कांग्रेसले किन लागू गर्न सकेन ? यसको समीक्षा गर्ला वा नगर्ला त्यो कांग्रेसकै कुरा हो,’ उनले भनेका छन्, ‘सत्ता गठबन्धन भित्रको सहमति र सहकार्यमा थप विभाजन र जटिलता नआवस् भन्ने चाहना र हाम्रो दाबी पनि नपुग्ने अवस्था भएकोले प्रदेश प्रमुखले बोलाउनु भएको सनाखतमा हामी सहभागी नहुने निष्कर्षमा पुग्यौं ।’
Discussion about this post