इटहरी इटहरी उपमहानगरपालिकाले बढाएको कर घटाउन नेकपा एमालेले विशेष अधिवेशनको माग गरेको छ ।
नेकपा एमालेबाट निर्वाचित सदस्यहरूले नियमअनुसार २१ दिनभित्र विशेष अधिवेशनको माग गर्दै निवेदन दिएका हुन् ।
नेपाल संविधानको धारा २२७ तथा गाउँ नगरसभा सञ्चालन कार्यविधि ऐन २०७५ को दफा ३ को उपदफा ४ बमोजिम उनीहरूले विशेष अधिवेशन बोलाउन माग गरेका हुन् ।
एमाले संसदीय दलको उपनेता प्रमोद शेर्पा तथा सचिव उमेश सुवेदीले प्रमुख प्रशासकीय अधिकृत रामचरित्र मेहतालाई सदस्यहरूको हस्ताक्षरसहितको पत्र दिएका छन् ।
इटहरी उपमहानगरपालिकाले चालु आर्थिक वर्षको बजेटमार्फत बढाएको कर समायोजन गर्न तथा घटाउनको लागि एमालेबाट निर्वाचित जनप्रतिनिधिहरुले पटक पटक माग गर्दै आएका छन् ।
वृद्धि भएको कर समायोजन गर्न तीव्र दबाब आएपनि उपमहानगरपालिकाले कर समायोजन गरेको छैन । कर समायोजन गर्ने विषयमा एमाले पक्षीय जनप्रतिनिधि र मेयरबीच मतभेदसमेत हुँदै आएको छ ।
कर वृद्धिकै विषयमा अध्ययन गर्न वडा नम्बर ३ का अध्यक्ष उमेश सुवेदीको संयोजकत्वमा समिति पनि बनेको थियो । सो समितिले ढिला गरी बुझाएको प्रतिवेदन कार्यपालिकामा छलफलको कार्यसूचीमा पेस भए पनि छलफल भएन ।
इटहरी उपमहानगरपालिकाका मेयर हेमकर्ण पौडेलले करका विषयमा सुरुवात समयदेखि नै कर नघटाउने पक्षमा अडानसहित बसेका छन् ।
Discussion about this post