इटहरी : इटहरीमा मध्यराति आगलागीमा परी मृत्यु भएकी महिलाले आफैं कोठामा आगो लगाएको प्रारम्भिक अनुसन्धानबाट खुलेको छ ।
इटहरी उपमहानगरपालिका ६ स्थित वीपी चौकमा शनिबार मध्यराति ११ः४५ बजे आगलागी हुँदा जलेर ५२ वर्षीया गोपीमाया कटवालको मृत्यु भएको थियो ।
आगलागीको प्रारम्भिक अनुसन्धान गर्ने क्रममा कटवालले आफैं आगो लगाएको खुलेको प्रहरीले जनाएको छ ।
इलाका प्रहरी कार्यालय इटहरीका प्रहरी निरीक्षक कैलाश चौधरीले प्रारम्भिक अनुसन्धानका क्रममा कटवालले बेडमा रहेको कपडामा आगो सल्काएपछि आफू सोही बेडमा बसेको र कटवालको शरीरमा आगो सल्किएको बताए ।
‘अहिलेसम्मको अनुसन्धानअनुसार आफैं आगो लगाएपछि सोही आगोमा सल्किएको खुल्न आएको छ,’ चौधरीले भने, ‘बेडमा रहेको कपडामा आगो लगाएर आफू पनि त्यही बेडमाथि बसेको र शरीरमा आगो सल्किएको प्रारम्भिक अनुसन्धानबाट अनुमान गरिएको छ ।’
आगो सल्किएपछि शरीरमा फैलिएको र उनको घटनास्थलमै मृत्यु भएको थियो ।
चौधरीका अनुसार कटवाल छोराबुहारीसँग कोठाभाडामा बस्दै आएकी थिइन् । छोराबुहारीको कोठामा बाहिरबाट चुकुल लगाएर आफ्नो कोठामा भित्रबाट चुकुल लगाएपछि उनले आगो लगाएको प्रहरी निरीक्षक चौधरीले बताए ।
‘डिप्रेसनको बिरामी रहेकाले पाँच वर्षअघि पनि आत्महत्याको प्रयास गरेको खुलेको छ,’ उनले टाकुरा न्यूजसँग भने, ‘पहिलापनि आत्महत्याको प्रयास गरेको र यसपटकको घटनाक्रम हेर्दा आत्महत्या नै देखिन्छ ।’
प्रहरीका अनुसार मानसिक रोगी रहेकी कटवालले यसअघि पनि आत्महत्याको प्रयास गरेकी थिइन् । मध्यराति आगलागी भएपनि उक्त कोठाबाहेक अरु कोठामा र मानवीय क्षति हुनबाट जोगिएको प्रहरीले जनाएको छ ।
मध्यराति आगलागी भएको थाहा पाएपछि स्थानीयबासीले प्रहरी र दमकललाई खबर गरेका थिए । दमकलको सहायतामा राति नै आगलागी नियन्त्रणमा लिएकाले थप क्षति हुनबाट जोगिएको प्रहरीको भनाइ छ ।
घटनाबारे थप अनुसन्धान जारी रहेको इलाका प्रहरी कार्यालय इटहरीले जनाएको छ ।
Discussion about this post