इटहरी : इटहरीको यातायात व्यवस्था कार्यालयमा चरम लापरबाही भएको पाइएको छ । एक हजार रुपैयाँ लिएर पाँच सयको रसिद दिने गरेको रहस्य बाहिरिएको हो ।
यातायात व्यवस्था विभाग सवारी चालक अनुमतिपत्र (लाइसेन्स) कोशी प्रदेश, इटहरीले एक हजार रुपैयाँ लिदैँ पाँच सयको मात्रै रसिद दिने गरको पाइएको छ ।
भोजपुरको आमचोकका गौतम खत्रीले सवारी चालक अनुमतिपत्रका लागि शुक्रबार राजस्व बुझाउन यातायात कार्यालय गएको र नेपाल इन्भेष्टमेण्ट मेगा बैँकको काउन्टरमा एक हजार रुपैयाँ तिरेपनि यातायात कार्यालयले भने पाँच सयको मात्रै रसिद दिएको बताए ।
उनले यातायात कार्यालयबाटै आफू ठगिनुपरेको र अनाहकमा यहाँका कर्मचारीहरूले दुःख दिने गरेको समेत बताए ।
‘त्यहाँभित्रका एक कर्मचारीलाई कति तिर्नुपर्छ भनेर सोध्दा ‘एफ’ क्याटेगोरीको रहेछ एक हजार तिर्नु भनेपछि बैँकको काउन्टरमा लाइन बसेर एक हजार रुपैयाँ तिरेँ,’ उनले भने, ‘त्यहाँ तिरेको एक हजारको रसिद यातायातको लेखा शाखामा पुगेपछि भित्रबाट ग्राहकप्रति भनेर पाँच सय रुपैयाँको मात्रै रसिद प्राप्त भयो ।’
रसिद चाँडै आयो भनेर आफू त्यहाँबाट निस्किएपनि तत्कालै रसिद हेर्दा पाँच सयको मात्रै रसिद आएपछि आफू आश्चर्यचकित भएको उनको भनाइ छ ।
पाँच सयको मात्रै रसिद आएपछि आफूलाई यातायातका कर्मचारीले बैँकमा पठाएको र बैँकले भने ‘जसले एक हजार तिर्नु भनेको थियो, उसैलाई भेट्नु’ भनेर फिर्ता पठाएको उनले बताए ।
‘त्यहाँबाट लेखा शाखामा पठाएपछि त्यहाँ आफूले घटनाक्रम सुनाएको तर लेखाले पैसा फिर्ता नहुने र आफूले तिरेको शुल्क बराबरको बिल पनि नआउने बताइयो,’ उनले ती कर्मचारीको भनाई उदृत गर्दै भने, ‘एकपटक इन्ट्री भइसकेको पैसा कोलोनिकामा जान्छ । त्यहाँबाट निकाल्न हामीले मिल्दैन । तपाईँले आधिकारिक रूपमा प्रोसेस गर्नुहुन्छ भने अर्थमन्त्रालय काठमाडौँ जानुपर्छ ।’
उनले कर्मचारीबाटै गल्ती भएको भएपनि ‘रिफन्ड’ गर्ने व्यवस्था हुनुपर्ने बताए ।
‘जो व्यक्तिले एक हजार रुपैयाँ तिर्नुपर्ने भनेर भने उसैले सरकारलाई चन्दा भयो भनेर पन्छिए,’ खत्रीको गुनासो थियो । खासगरी यातायात कार्यालय इटहरीमा बिचौलिया हाबी हुँदा सेवाग्राहीले प्रत्यक्ष सुविधा लिनबाट बञ्चित हुँदै आएका छन् ।
खत्री एक प्रतिनिधि पात्र मात्र हुन् । यस कार्यालयबाट दैनिक दर्जनौँ यात्रुहरू ठगिने, सहजै सेवा लिनबाट बञ्चित हुने र बिचौलियाको ‘कब्जा’मा पर्नेगरेको सेवाग्राहीहरूले गुनासो गर्दै आएका छन् ।
इटहरी ४ का हिमाल निरौलाले यातायात व्यवस्था कार्यालयले सेवाग्राहीलाई विभिन्न बहानामा दुःख दिने, बिचौलियाको माध्यमबाट मात्रै काम गर्ने गरेको बताए ।
‘सेवा इटहरीबाट दिने अनि केही समस्या पर्दा काठमाडौँ जानुपर्छ भनेर पन्छिने घटनाले पनि यहाँको वास्तविक चित्र उदांगो हुन्छ,’ उनले टाकुरा न्यूजसँग भने, ‘कर्मचारीकै लापरबाहीले भएको त्रुटिबाट पाँच सय रुपैयाँ ठगीमा पर्दा उठाउनका लागि काठमाडौँ जाने र पचास हजार खर्च हुन्छ भन्दै गैरजिम्मेवारीपूर्ण जवाफ दिने गरेका छन् ।’
उनले यहाँका कर्मचारीबाट हुने गैरजिम्मेवारीपूर्ण जवाफ र तौरतरिकाका कारण आफूहरू आजित हुने गरेको दुखेसो गरे । निरौलाले थपे, ‘उत्तरदायित्व बहन गर्ने कर्मचारीको हेलचेक्र्याईँका कारण दैनिक धेरैजसो सेवाग्राहीहरू मारमा पर्ने गरेका छन् । यसबारे नियामक निकाय मूकदर्शक बनेको छ ।’
यता निमित्त कार्यालय प्रमुख टंक प्रसाईँले पाँच सय नै रसिद तिर्नुपर्ने बताए । ‘त्यस शीर्षकमा तिर्नुपर्ने पनि पाँच सय नै हो । रसिद पनि पाँच सय नै आउँछ,’ उनले भने, ‘रसिद तिर्नुअघि कम्फर्म गर्नुपथ्र्यो । कोही व्यक्तिको खातामा भए फिर्ता हुनसक्थ्यो । बैँकमा राजस्व तिरेपछि फिर्ता हुन गाह्रो हुन्छ ।’
उनले आफू बिदामा रहेका कारण यसबारे आइतबार थप बुझ्ने बताए । उनले भने, ‘बैँकले तत्कालै केही समाधान गर्न सक्ने अप्सन हुन्थ्यो कि ! तर, कम्प्युटरबाट इन्टर भइसकेपछि राजस्वमा जम्मा हुन्छ । त्यही पनि यसबारे म बुझ्नेछु ।’
Discussion about this post