इटहरी उपमहानगर : यी हुन् जनजीवनसँग जोडिएका काम

इटहरी : इटहरी उपमहानगरपालिकाका जनप्रतिनिधिहरूले कार्यभार सम्हालेर काम सुरु गरेको २ वर्ष हुन लागेको छ ।

नयाँ नेतृत्व आइकन सुरुका केही समय कर विवादमा फसेको इटहरी उपमहानगरपालिकाले पछिल्ला दिनमा गरेका कामले नगरबासीको ध्यान तानेको छ ।

आम सर्वसाधारण नगरबासीले उपमहानगरको कामलाई कसरी मूल्याङ्कन गरेका छन् ? २ बर्षे कार्यकाललाई कसरी सम्झनुहुन्छ ? भनी नगरबासीहरूलाई सोधेका छौँ । जसमध्ये अधिकांशले मुख्य ५ काम सम्झिएको प्रतिक्रिया दिए ।

खोला पैनी सफाइ, इटहरी अस्पतालको सुधार, विद्यालय खाजा कार्यक्रम तथा शैक्षिक गुणस्तर सुधार, नागरिक सहायता कक्ष र पूर्वाधार विकासको काम नगरबासीले रुचाएका ५ काम हुन् ।

हामीले कुराकानी गरेकामध्ये धेरैले मुख्य रूपमा यी ५ कामलाई जोडेर प्रतिक्रिया दिए । दैनिक जनजीवनसँग जोडिएको र प्रत्यक्ष अनुभव गर्न पाएकाले राम्रो लागेको उनीहरूको भनाई छ ।

खोला पैनी सफाइ

खोला पैनी सफाइको कामलाई अधिकांश नगर बासीले राम्रो काम भनी प्रशंसा गरेका छन् । वर्षामा डुबानको पीडा भोग्दै आएका नगर बासीले खोला सफा भएपछि डुबान नहुने अपेक्षा गरेको बताए ।

अघिल्लो कार्यकालमा चर्चा मात्रै भएको तर काम नहुँदा नगरबासीले यसपटक पनि काम हुन्छ भन्ने सोचेका थिएनन् । तर उनीहरूको सोचाई विपरीत खोला सफाइ भइरहेको छ । यस कारण पनि उनीहरूको ध्यान तानिएको हो ।

इटहरी वडा नम्बर २ निवासी राधिका तिम्सिनाले खोला सफाइको काम राम्रो लागेको प्रतिक्रिया दिइन् ।

‘नयाँ मेयर आएपछि खोलानाला सफाइदेखि टेङ्ग्रा खोला सफाइ समेत भयो, बाटो सडक पनि बनेको छ । राम्रै काम भएको देखेका छौँ,’ तिम्सिनाले भनिन्, ‘मेयर सावले स्कुल पनि सुधार गर्छु भन्नु भएको छ । त्यो पनि राम्रै लागेको छ ।’ खोला सफा भएपछि डुबानमा केही हदसम्म रोकथाम हुने उनको विश्वास छ ।

‘बाढी आउला भन्ने डर सधैँ हुन्छ । तर यो वर्ष खोला सफा गरेका कारण बाढी नपस्ला कि भन्ने लागेको छ । हेरौँ के हुन्छ ।’ इटहरी ४ कि विमला भट्टराईले भनिन् ।

प्रतिक्रिया व्यक्त गर्ने अन्यले पनि यो विषयलाई भन्न छुटाएनन् । टेङ्ग्रा खोलाले दिएको दुःख सम्झिएका नगरबासीलाई यो कामले खुसी बनाएको छ ।

उपमहानगरपालिकाले खेती खोला पनि सफा गर्न खोलाको क्षेत्राधिकारको जग्गा खाली गर्न सूचना जारी गरेको छ । यहाँको खोला पनि सफाइ हुने र खोलाको जग्गामा बनाइएका घर भत्किएलान् भन्ने लागेको नगरबासीको भनाई छ ।

इटहरी अस्पतालको सुधार

इटहरी वडा नम्बर ९ का बद्री शर्माले आजकाल नियमित रूपमा स्वास्थ्य जाँचका लागि इटहरी अस्पताल जाने गरेको बताए । पहिले बिमाको रेफर लिन मात्रै जाने उनी अहिले भने इटहरी अस्पतालमै चेकजाँच गर्ने गरेको बताए ।

विशेषगरी नियमित रूपमा डाक्टर भेटिने, ब्लड, सुगर, ईसिजी, एक्स रे, लगायतका चेकजाँच पनि हुन थालेपछि ठूलो समस्या आए मात्रै धरान, विराटनगर जानु परेको उनले सुनाए ।
यस्तै इटहरी ९ कै श्याम घिमिरेले अस्पतालमा सुधार आएको आफूले प्रत्यक्ष अनुभव गरेको बताए ।

‘अहिले अस्पतालको सेवाको स्तर वृद्धि भएको छ । सेवा वृद्धि भएपछि अहिले मानिसहरू अस्पतालमा चेकजाँचका लागि जाने गरेको मैले अनुभव गरेको छु ।’ उनले भने ।

यी २ जनाले जस्तै अनुभव सुनाउने अन्य नगरबासीले पनि इटहरी अस्पतालमा सुधार आएको प्रत्यक्ष अनुभव गरेको प्रतिक्रिया दिए ।
अस्पतालमा के कति सुधार आएको छ, २ अघि र पछिको अवस्था तुलना गर्दा सजिलै थाहा हुने नगरबासीको भनाई छ । अस्पतालमा भीड बढेपछि अझै प्रभावकारी व्यवस्थापनको माग हुन थालेको छ ।

स्वास्थ्य उपचारको सुधार प्रत्यक्ष देख्न र अनुभव गर्न पाएको र स्वास्थ्य क्षेत्रमा हुने खर्च कटौती समेत भएको नगर बासीले बताएका छन् ।
दैनिक जनजीवनसँग जोडिएको स्वास्थ्य क्षेत्रमा आएको सुधारले नगर बासीको ध्यानाकर्षण गर्न सफल भएको देखियो ।

विद्यालय खाजा कार्यक्रम, शैक्षिक गुणस्तर सुधार

सामुदायिक विद्यालयमा सुरु भएको विद्यालय खाजा कार्यक्रमलाई पनि नगर बासी अभिभावक र विद्यार्थीले राम्रो काम भनेका छन् । उपमहानगरले गरेका काम मध्ये राम्रो काम विद्यालय खाजा कार्यक्रम रहेको प्रतिक्रिया दिएका छन् ।

सुरुवातमा केही विवादास्पद कुरा आएपनि अहिले भने प्रभावकारी रूपमा सञ्चालन भइरहेको उपमहानगरपालिकाले जनाएको छ ।

विद्यालयमा अनियमित भएका विद्यार्थीलाई नियमित बनाउन र विद्यालय जान उत्प्रेरित गर्न विद्यालय खाजा कार्यक्रम सफल भएको सरस्वती जब्दी माविकी शिक्षिका प्राथना त्रितालले बताइन् । विशेषगरी विपन्न समुदायका विद्यार्थीहरूलाई धेरै राहत भएको शिक्षिका त्रितालको भनाई छ ।

यो कार्यक्रम सुरु भएपछि सामुदायिक विद्यालयमा उल्लेख्य मात्रामा विद्यार्थीको सङ्ख्यामा वृद्धि भएको उनले जानकारी दिइन ।

अर्कोतर्फ विद्यालयमा अङ्ग्रेजीको पठनपाठनले गर्दा बोर्डिङ स्कुलका विद्यार्थीहरू पनि सामुदायिक विद्यालयमा आकर्षित भएको उनले बताइन् । यसले सामुदायिक विद्यालयहरू पनि सुधार भएको आफूले प्रत्यक्ष अनुभव गरेको उनको भनाई छ ।

अघिल्लो शैक्षिक सत्रबाट उपमहानगरपालिका आफैले कक्षा ६ सम्म विद्यालय खाजा कार्यक्रम सुरु गरेको थियो । खाजा कार्यक्रम यो शैक्षिक सत्रबाट थप व्यवस्थित गर्ने उपमहानगरले जनाएको छ ।

विद्यार्थीहरूलाई पौष्टिक आहारा खुवाउन सामुदायिक विद्यालयमा खाजा कार्यक्रम सुरु गरिएको थियो । सामान्य चिउरा भुजा खाने विद्यार्थीहरूले अहिले सात दिन सात थरिका पौष्टिक खानेकुरा खान पाएका छन् ।

पौष्टिक खाजा खुवाउने कार्यक्रमले विद्यालयमा विद्यार्थी ड्रप आउट हुने समस्या समाधान भएको छ । विद्यार्थीहरू सबै जसो दिन विद्यालय जान थालेका छन्, भने पुरा दिन कक्षामा बसेर पढ्न थालेका छन् ।

इटहरी ६ का नवराज सुवेदीले शैक्षिक क्षेत्र सुधारका लागि मेयर हेमकर्ण पौडेलले सुरु गरेको अभियानले राम्रो प्रभाव पारेको बताए ।

विद्यालय खाजा कार्यक्रमसँगै सामुदायिक विद्यालय सुधारका लागि सुरु गरिएका पहलले पूर्णता नपाईसके पनि निरन्तरता भए सफल हुने देखिएको उनले बताए । शैक्षिक क्षेत्र सुधार गर्न यो वर्ष लागु गर्ने गरी मेयर पौडेलले २७ बुँदे सङ्कल्प पत्र जारी गरेका छन् ।

निजी विद्यालयको व्यवस्थापन गर्न शुल्क निर्धारण गर्ने विषयलाई पनि नगरबासीले राम्रो काम भनी प्रतिक्रिया दिएका छन् । भर्ना शुल्क लिन नपाउने नियमलाई अभिभावकहरूले राम्रो भने छन् ।

यसै शैक्षिक सत्रबाट सबै विद्यालयमा एउटै पोसाकको निर्णयले सामुदायिक विद्यालयका विद्यार्थीहरू उत्साहित भएका छन् ।

एउटै पोसाकको विषय निजी विद्यालयले विवाद सृजना गर्दै अदालत सम्म मुद्दा परेको थियो । तर अदालतबाट पनि अन्तरिम आदेश नआएपछि उपमहानगरले लागु गर्ने बताउँदै आएको छ । यो विषयले पनि नगर बासी अभिभावक र विद्यार्थीहरूलाई आकर्षण गराएको छ ।

नागरिक सहायता कक्ष र प्रशासन सुधार

सेवा लिन पुगेका नगर बासीले पहिले कहाँ जाने अलमल हुने तर सहायता कक्ष स्थापना पछि सजिलो भएको बताएका छन् । सेवा लिन पुगेका जो कोही सेवाग्राही नागरिक सहायता कक्षमा एक पटक पुग्ने र अलमल भए सोधपुछ गरी काम गर्ने गरेका छन् ।

नागरिक सहायता कक्षमा निःशुल्क चिया कफीको विषयले नगर बासीमा राम्रै चर्चा पाएको छ ।

उपमहानगरपालिकाको नागरिक सहायता कक्षमा भेटिएका सेवाग्राही रमेश बस्नेतले काम सकेर कालो कफी खाएर बसेको बताए ।

कर्मचारीले सजिलै काम गरिदिएको बताएका बस्नेतले काम सकेर कफी खान आएको बताए । बाहिर सुने जस्तै रहेको पाइएको उनले बताए ।

शाखा महाशाखामा कर्मचारी भेटिने,हुने भिडभाड हटेपछि सेवाग्राहीले परिवर्तनको महसुस गरेका छन् । प्रदान गरिने कतिपय सेवालाई अनलाइन बनाइएको छ । नगर बासीले घरमै बसाबसी सेवा लिन सक्ने वातावरण तयार छ ।

घर नक्सालाई अनलाइन बनाइएको छ । जसले गर्दा पहिले जस्तो फाइल बोकेर धाउनुपर्दैन । भीडभाडमा लाइन लाग्नु पर्दैन । कर तथा राजश्व तिर्न मोबाइल तथा अनलाइनबाट सजिलै तिर्न सकिने भएकाले नगर बासीले सेवामा सुधार आएको महसुस गरेका छन् ।

पूर्वाधार विकास

पूर्वाधारको क्षेत्रमा सडक, पुल निर्माणमा पनि उपमहानगरले राम्रै काम गरेको नगरबासीले बताएका छन् । पुरानो बसपार्कलाई नयाँ आधुनिक निर्माण सुरु भएको,आकाशे पुल, आधुनिक सभा हल बन्न ठेक्का लागेको विषयलाई पनि राम्रो काम भनी उनीहरूले प्रतिक्रिया दिएका छन् ।

इटहरी चोकमा बन्ने भनिएको आकासे पुल समयमै पूरा भएको हेर्न चाहेको प्रतिक्रिया दिएका छन् ।

स्थानीय श्याम घिमिरे इटहरीमा अत्यन्तै आवश्यक देखिएको आकासे पुल निर्माण गर्ने विषय आफूलाई राम्रो लागेको बताए । आकासे पुल तोकिएको समयमै निर्माण सम्पन्न भए इटहरीको ट्राफिक व्यवस्थापनमा सुधार आउने घिमिरे बताए ।

_ ADVT