इटहरी : इटहरी १ का १९ वर्षीय सविन घिमिरे सानैदेखि खेलाडी बन्ने रूचि राख्थे । उनी घरबाट लुकीलुकी फुटबल खेल्न जान्थे । खेलाडी बन्ने चाहना र दृढ संकल्प उनीसँग थियो । त्यसैले पनि उनी अहिले अन्डर ट्वान्टी (२० वर्षभन्दा कम उमेर समूह)बाट राष्ट्रिय खेलाडी बनेका छन् ।
सुनसरीबाट प्रतिनिधित्व गर्दै राष्ट्रिय खेलाडी बनेका उनले यसअघि गत भदौ २ गतेदेखि १२ गतेसम्म भएको अन्डर ट्वान्टी साफ च्याम्पियनसिप खेलमा सहभागी भए ।
एन्फा एकेडेमीमा भएको खेलमा पहिलोपटक उनले श्रीलंकासँग खेल खेल्ने अवसर पाए । पहिलोपटक विदेशसँग खेल्नुपर्ने चुनौती र अवसर दुवै थियो, उनीसँग । उनी भन्छन्, ‘पहिलोपटक म मात्रै एक्लो थिएँ, विदेशसँग खेल्ने खेलाडी । यसअघि अरू साथीहरूले खेलिसक्नुभएको थियो ।’
उनले पहिलोपटक देशको लागि खेल्दैगर्दा आफ्नो मनमा उत्साहसँगै खुशीले गद्गद् भएको क्षण सम्झिए । ‘देशको लागि खेल्दा राष्ट्रिय गाना बज्नुअघि मुटु ढुकढुक भयो, सायद खुशीले पनि होला,’ सविन भन्छन्, ‘वास्तवमा खेलाडीले खेल जित्दा मात्रै राम्रो हो । सबैले खेल जित्दा वाहवाह गर्छन्, हार्दा त त्यस्तै हो ।’
पहिलोपटक श्रीलंकालाई पराजित गरेसँगै उनले बंगलादेश र भूटानसँग पनि खेल खेल्ने अवसर पाए । त्यससँगै फाइनलमा पुनः बंगलादेशसँग खेल खेल्ने अवसर पाएपनि उक्त अवसरलाई आफ्नो देशको कब्जामा पार्न नसकेको उनले सुनाए ।
नेपालमा भएको साफ च्याम्पियनसिपपछि कम्बोडियाको चाइनाइज ताइपेमा उनी खेल खेल्न सहभागी भए ।
त्यहाँस्थित चाइनिज ताइपे, उज्वेगस्थानसँग खेल खेल्ने अवसर पाएका उनले भने, ‘एउटा टिमले खेल जित्नुमा कुनै एक व्यक्तिको मात्रै होइन, हरेक खेलाडीको उत्तिकै भूमिका हुन्छ । सबैले आफ्नो जिम्मेवार निर्वाह गरेमा खेल जित्न सहज हुन्छ ।’
उनी डिफेन्डरको भूमिकामा छन् । यसअघि उनले सी डिभिजन लिग मनोहरा युनाइटेडबाट खेल खेलेका थिए । ‘लिग भएकाले सबै क्लबसँग खेल्नुपर्छ । एकजना मात्रै राम्रो खेलेर हुँदैन, सबैले राम्रो खेल्नुपर्छ, मिहिनेत गर्नुपर्छ,’ उनले थपे ।
उनी अब सिनियर टिममा सहभागी हुने सोच राखेका छन् । त्यसका लागि अहिलेदेखि नै तयारी गरिरहेकोसमेत उनले सुनाए ।
उनले देशमा खेलाडीलाई बाँच्नको लागि चुनौती भएका कारण नै पछिल्लो समय धेरै खेलाडीहरू विदेशिनुपरेको सुनाए ।
‘धेरैजना दाइ, दिदीहरू विदेश जानुको पछाडि भने पारिवारिक कुरा नै हो । विदेश जानुमा पैसा नै जोडिन्छ,’ उनी भन्छन्, ‘मुख्य त आर्थिक नै हो । सबैकुरा आर्थिकमै जोडिन्छ । खेलाडीहरू विदेश जानु कुनै रहर होइन, बाध्यता नै हो । खेलाडीको लागि राज्यले संरक्षण गर्नुपर्छ ।’
कसरी छनोट हुन्छन् राष्ट्रिय खेलाडी ?
खासगरी जिल्लामा रहेका एन्फाले छनोट गरेर प्रदेशलाई नाम सिफारिस गर्छ । सोहीअनुसार एन्फा सुनसरीले पनि सविनलाई छनोट गरेर एन्फा कोशी प्रदेशमा सिफारिस गरेको थियो । प्रदेशले काठमाडौँमा नाम पठाएपछि उनी छनौटका लागि क्लोज क्याम्पभित्र परे ।
क्लोज क्याम्पमा ४० जनाभित्र परेपछि ३० जना छनोट हुन्छ । ३० जनाबाट २३ जना छनोट हुन्छ । २३ जना नै एउटा प्रतियोगिता खेल्न योग्य हुन्छन् ।
‘म छनोट चरणमा चारपटक पुगेपनि अन्तिम चरणमा छनोट भएको थिइँन,’ उनले भने, ‘यो पटक चैँ जसरी पनि छनोटमा पर्छु भन्ने आत्मविश्वास थियो ।’
संघर्षका ती दिन…
इटहरी १ स्थित राष्ट्रिय माध्यमिक विद्यालयमा कक्षा १२ सम्म अध्ययन गरेका उनले आँपगाछीदेखि तालतलैया पुगेर ट्रेनिङ गर्नुपथ्र्यो । ‘एक वर्षजति प्राक्टिस गरियो ।
पछि तालतलैया फुटबल क्लबमै आवद्ध भएर स्थानीय टुर्नामेन्टहरू पनि खेलेँ,’ उनले भने, ‘सानैदेखि नै खेल क्षेत्रमा रूचि थियो । त्यसैले पनि यसमै भविष्य खोजेको हुँ ।’
उनले देशमा खेलाडीलाई खेल खेल्ने वातावरण हुनुपर्ने बताए ।
‘खेल खेल्ने वातावरण हुनुपर्छ, त्यसो हुँदा खेलाडीलाई सहज हुन्छ,’ खेलाडी बन्दा खुशी लाग्छ होइन ? भन्ने प्रश्नमा सविनले थपे, ‘दुःखै, दुःख हुन्छ, खुशी त के हुनु र ! जित्दा मात्रै राम्रो, हार्दा त त्यस्तै हो ।’
उनले आफू अहिलेको स्थानमा पुग्नुमा तालतलैया फुटबल क्लबको महत्वपूर्ण योगदान रहेकोसमेत जनाए ।
‘यस क्षेत्रमा हुने ठूूला गोल्डकप लगायतको खेलहरूमा सहभागी हुुने इच्छा छ,’ उनले भने, ‘घर व्यवहारको तनाव नहुने हो, र खेलमै मात्र ध्यान दिन पाइयो भने अझै धेरै राम्रो गर्न सकिन्छ ।’
भिडियो
Discussion about this post