इटहरी : इटहरीस्थित जनता बहुमुखी क्याम्पसका विद्यार्थीहरूले झागड समुदायको सर्वेक्षण गरेका छन् ।
क्याम्पसमा स्नातक तह प्रथम वर्षका विद्यार्थीहरूले सामुदायिक सामाजिक सर्वेक्षण अन्तर्गत झागड समुदायको तथ्यांक संकलन गरेका हुन् ।
सामाजिक शास्त्र विषय विभाग अन्तर्गत समाजशास्त्र, अर्थशास्त्र र अंग्रेजी विषय अध्ययन गर्ने विद्यार्थीहरूले ३० पूर्णाङकको प्रयोगात्मक कार्यको एउटा हिस्साको रूपमा यो अध्ययन गरेका हुन् ।
विषय विभागले निर्धारण गरेको सुनसरीको कोसी गाउँपालिका वडा नं. २ मा रहेको उराउ (झागड) बस्तीमा गएर उक्त समुदायको संस्कृति, संस्कार र रहनसहनबारे अध्ययन गरिएको हो ।
समुदायमा महिलाको अवस्था, स्वास्थ्य शिक्षामा पहुँच र त्यसको अवस्था, रोजगारी र सामाजिक क्रियाकलापबारे अध्ययन गरिएको हो ।
क्याम्पसका उपप्राध्यापक तथा विषय विभाग प्रमुख अर्जुन उप्रेतीका अनुसार उक्त अध्ययनपछि विद्यार्थीहरूले क्याम्पसमा आएर समूहगत रूपमा प्रतिवेदन बनाएर कक्षामा प्रस्तुत गर्नेछन् ।
‘यो प्रारम्भिक चरणको सर्वेक्षण भएको र अन्तिम वार्षिक परीक्षाभन्दा अगाडि अर्काे चरणमा फाइनल प्रतिवेदनका लागि विद्यार्थीहरू कक्षामा सिकेको सैद्धान्तिक ज्ञानलाई पूर्ण रूपमा व्यवहारमा उतार्न पुनः एकपटक फिल्ड भिजिटमा जानेछन्,’ उप्रेतीले भने, ‘अन्तिम मूल्यांकनका लागि प्रतिवेदन बनाउनका निम्ति चरण–चरणमा फिल्ड गएर विद्यार्थीले विभिन्न समुदायको संस्कृतिबारे नजिकबाट नियाल्नेछन् ।’
यसरी विभिन्न समुदायको संस्कृतिबारे जानकार हुँदा विद्यार्थीहरू समाजसँग नजिक हुने र ‘रिसर्च’का लागि सहज हुने उप्रेतीले बताए ।
सहायक क्याम्पस प्रमुख तथा उपप्राध्यापक इन्द्रप्रसाद प्याकुरेलका अनुसार मानविकी शंकायमा विश्वविद्यालयले ३० पूर्णाङकको प्रयोगात्मक पाठ्यक्रम राखेपनि अधिकांश कलेजहरूले विद्यार्थीहरूलाई फिल्ड भिजिटमा नलैजाने उदृत गरे ।
‘प्रयोगात्मक ज्ञानको अभावले पढिसकेपछि पनि विद्यार्थीले काम गर्न नसक्ने अवस्था रहेको छ,’ उनले भने, ‘तर प्रथम वर्षदेखि नै फिल्डमा जाँदा विद्यार्थी प्रत्यक्ष रूपमै समुदायसँग जोडिन्छन् ।’
उक्त अध्ययनमा उराउ समुदायले आफ्नो सांस्कृतिक नृत्य ‘कर्माधर्मा’धर्माकर्मा प्रस्तुत गरेका थिए ।
Discussion about this post