इटहरी : लागूऔषधविरूद्ध कोशी प्रदेश प्रहरीले थालेको कडा निगरानी अभियानमा एक वर्षमै झण्डै दुई हजार व्यक्ति कानूनी दायरामा आएका छन्।
लागूऔषधले सामाजिक अपराध बढाइरहेको निष्कर्षसँगै कोशी प्रहरीले एक वर्षको अवधिमा एक हजार ९८५ जनालाई पक्राउ गरी कानुनी दायरामा ल्याएको हो।
कोशी प्रदेश प्रहरी कार्यालय विराटनगरका प्रवक्ता प्रहरी उपरीक्षक दीपक पोखरेलकाअनुसार लागूऔषधको प्रयोगका कारण समाजमा अपराध बढ्दै गएको छ ।
खासगरी हत्या, लुटपाट, चोरी लगायतका विभिन्न प्रकारका आपराधिक घटना बढ्ने सम्भावना रहेकाले यसको प्रयोग तथा ओसारपसारलाई नियन्त्रण तथा निरुत्साहित गरी सामाजमा शान्ति सुरक्षा व्यवस्था प्रभावकारी बनाउन कोशी प्रदेश प्रहरी सवल रहेको उनले दाबी गरे।
प्रवक्ता पोखरेलकाअनुसार अनुसार अभियान अन्तर्गत मुख्य लोकमार्ग, भित्री सडक, सीमावर्ती क्षेत्र, सशंकित स्थान तथा सवारीसाधनमा निगरानी बढाइएको छ। सीमा नाकामा कुकुरसहितको प्रहरी टोली परिचालन गरिएको छ भने ठूलो मात्रामा लागूऔषध ओसारपसारमा संलग्न समूहलाई गोली प्रयोग गरेर पनि नियन्त्रणमा लिएको जनाएको छ।
खासगरी आर्थिक वर्ष २०८१।०८२ मा कोशी प्रदेशको झापाबाट मात्रै१ ग्राम ५६० मिलिग्राम चरेश, २ किलो ८८२ ग्राम ४६८ मिलिग्राम ब्राउनसुगर, मनोसामाग्री चक्की/क्याप्सुल ६३ हजार ५६० थान र एम्पुल ३९ थान बरामद गरिएको छ ।
यसैगरी मोरङमा १ किलो ७७० ग्राम ८३ मिलिग्राम ब्राउनसुगर, विभिन्न मनोसामाग्री औषधी ८० हजार ९२३ वटा चक्की र क्याप्सुल, एम्पुल १ हजार ४८५ थान बरामद गरिएको प्रहरीको अभिलेखमा रहेको छ ।
यता, जिल्ला प्रहरी कार्यालय सुनसरीले चरेश २ ग्राम २८ मिलिग्राम, ७२८ ग्राम ५३९ मिलिग्राम ब्राउनसुगर, विभिन्न मनोसामाग्री औषधी ४ लाख २८ हजार ६८३, चक्की, क्याप्सुल, एम्पुल ३१८ थान बरामद गरेको छ ।
‘चेकजाँचमा कडाई भएकै कारण मलद्वार तथा शरीरको विभिन्न भागमा लुकाएर लागूऔषध ओसार पसार गर्ने व्यक्तिलाई पक्राउ गरिएको छ,’ पोखरेलले भने, ‘ठूलो परिमाणमा लागूऔषधको कारोबारी गर्ने गिरोहलाई गोली प्रहार नै गरेर पनि नियन्त्रणमा लिइएको छ ।’
लागूऔषधको प्रयोग, बेचबिखन तथा ओसारपसारमा संलग्न रहेका व्यक्ति ‘कि जेलमा, कि सुधार गृहमा’ भन्ने उद्देश्यका साथ कोशी प्रदेशमा बढ्दो लागूऔषधको प्रयोग, वेचबिखन तथा ओसारपसारलाई नियन्त्रण गर्न प्रहरी प्रतिवद्ध रहेको जनाइएको छ ।
पछिल्लो समय लागूऔषध प्रयोकर्ता बढ्दै गएको र त्यसले समाजमा आपराधिक गतिविधि हुनसक्ने प्रहरीको निष्कर्ष छ ।
लागूऔषधको प्रयोग तथा ओसारपसार कानूनद्वारा बर्जित कार्य रहेको थाहा हुँदाहुँदै पनि कतिपय प्रयोकर्ता लहलहैमा लागेर फसिरहेको प्रहरीको अनुसन्धानबाट खुलेको कोशी प्रदेश प्रहरीका डीआईजी ईश्वर कार्की बताउँछन् ।
‘लागूऔषधको प्रयोग गर्नु कानुनद्धारा बर्जित हो भन्ने अधिकांश मानिसलाई थाहा छ । तर, साथीभाइको लहलहैमा, अज्ञानताको कारण, उत्सुकता जागेर, पारिवारिक तनावलगायतका कारणले यसमा युवापुस्ता फसिरहेका छन्,’ डीआईजी कार्कीले भने, ‘विभिन्न बहाना बनाएर आफ्नो मनलाई स्थिर राख्न नसकेकै कारण अधिक मानिस लागूपदार्थ दुव्र्यसनमा फसिरहेका छन् ।’
खासगरी सीमा क्षेत्रबाट ब्राउनसुगर, ट्याब्लेट, क्याप्सुलजस्ता लागूपदार्थ भित्रिने गरेको र कोशी प्रदेशका पहाडी जिल्लाबाट गाँजाको कारोबार हुने गरेकाले निगरानी बढाइएको प्रहरीले जनाएको छ ।
Discussion about this post