इटहरी : सादा पोशाकमा प्रहरी कर्मचारी हुँ भनी विभिन्न व्यक्तिहरूलाई धाकधम्की दिँदै रकम असुल गर्दै आएका सुनसरीका एक युवकलाई प्रहरीले पक्राउ गरेको छ।
पक्राउ पर्नेमा इनरुवा नगरपालिका–९ निवासी ३० वर्षीय पवन मेहता रहेका छन्।
उनले आफू जिल्ला प्रहरी कार्यालय सुनसरीमा कार्यरत सादा पोशाकका प्रहरी भएको भन्दै विभिन्न व्यक्तिहरूबाट रकम असुल गर्दै आएको भन्ने सूचनाका आधारमा प्रहरी परिचालन गरिएको थियो।
प्रहरीका अनुसार २०८२ साउन ८ गते साँझ ७ बजे जिल्ला प्रहरी कार्यालय सुनसरी र अस्थायी प्रहरी पोष्ट पोखरी चोकबाट खटिएको संयुक्त प्रहरी टोलीले भोक्राहा नरसिंह गाउँपालिका–५, चप्राहा स्थितबाट को १५ प ८८७ नम्बरको मोटरसाइकलसहित मेहतालाई नियन्त्रणमा लिएको हो।
पक्राउ परेका मेहतालाई जिल्ला प्रहरी कार्यालय सुनसरीको हिरासतमा राखेर आवश्यक अनुसन्धान अगाडि बढाइएको प्रहरीले जनाएको छ।
Discussion about this post