विराटनगर : आगामी आइतबार विराटनगरमा निकालिने ऐतिहासिक राधाकृष्ण रथयात्राको सम्पूर्ण तयारी पूरा भएको छ।
कृष्ण जन्माष्टमीको भोलिपल्ट आयोजना हुने यो रथयात्रा पूर्वको सांस्कृतिक महत्त्व बोकेको परम्परा हो। रथको सजावट बाहेक व्यवस्थित र मर्यादित सञ्चालनका लागि गठन गरिएका १७ उपसमितिले आफ्नो जिम्मेवारी पूरा गरेका छन्।
आयोजकका अनुसार मोरङ, सुनसरी, झापा, धनकुटा, सप्तरी लगायतका जिल्लासहित भारतको बिहारबाटसमेत भक्तजन आउने छन्।
यस वर्ष करिब पाँच लाख भक्तजनको उपस्थिति हुने अनुमान गरिएको छ। रथ तानेमा वा छोएमा पूण्य प्राप्त हुने धार्मिक विश्वास छ।
२०८० सालदेखि कोसी प्रदेश सरकारले रथयात्राको दिन प्रदेशभर सार्वजनिक बिदा दिँदै आएको छ।
२१ फिट ३ इन्च उचाइ, १४ फिट चौडाइ र १९ फिट लम्बाइको रथमा श्री राधाकृष्णको मूर्ति राखी विराटनगरको तीनपैनीस्थित राधाकृष्ण मन्दिरबाट यात्रा सुरु गरिनेछ।
यो परम्परा वि.सं. १९८८ मा खटयात्राका रूपमा सुरु भई २०२४ सालदेखि रथयात्रामा परिणत भएको हो।
Discussion about this post