इटहरी : इटहरीमा जेन–जी पुस्ताको शान्तिपूर्ण प्रदर्शन प्रशासनको लापरबाही र सुरक्षाकर्मीको ढिलासुस्तीका कारण हिंसात्मक रूप लिँदा उपमहानगरको कार्यालय जल्यो । शहर रणभूमिमा बदलियो र प्रहरीको गोली लागेर दुई युवाले ज्यान गुमाउँदा परिवारको सपना अधुरै टुट्यो।
सोमबार बिहान ११ बजेतिर बाक्लो मात्रामा भेला भएका युवापुस्ताले शान्तिपूर्ण प्रर्दशन गरिरहेका थिए । तर, इटहरी उपमहानगर गेटअघि परिचालन भएका प्रहरी र प्रदर्शनकारीबीच दिउँसो एकापसमा भेला भएका थिए ।
थोरै संख्यामा रहेका प्रहरीलाई नै ढुंगामुढा गर्दै प्रदर्शनकारी पालिकाभित्र प्रवेश गर्न खोजे । प्रहरीले केहीबेर रोक्ने प्रयास गरेपनि थोरै संख्यामा रहेका प्रहरीले भीडलाई नियन्त्रणमा लिन सकेन ।
उपमहानगरभित्र प्रवेश गरिसकेपछि प्रर्दशनकारीले मेयर हेमकर्ण पौडेलको कार्यकक्ष र जिन्सी शाखामा आगजनी गरेका छन् ।
दिउँसो करिब ३ः३० बजेतिर आगजनी हुँदा ठूलो क्षति भएको छ । आगजनीका कारण कागजपत्र, ल्यापटप, कम्प्युटर पूर्ण रुपमा क्षति भएका छन् ।
तत्काल आगजनी नियन्त्रण गर्न कठिनाइ भएपनि साँझमा भने आगो नियन्त्रणमा लिइएको छ ।
त्यसैगरी इटहरीको मुख्य चौकमा रहेको प्रतिमा पनि जलाइएको छ । साँझको समयमा उक्त प्रतिमा जलाइएको हो । यसैगरी उपमहानगरको गेटमै रहेको बहुउद्देश्यीय सहकारीको भवन पनि तोडफोड गरिएको छ ।
उपमहानगरमा आगजनी गरेपछि प्रदर्शनकारीहरू इलाका प्रहरी कार्यालयतर्फ गएका थिए । सो क्रममा प्रहरीले गोली चलाउँदा दुई जनाको मृत्यु भएको छ ।
मृतकमध्ये एक युवक इटहरी १६ का २३ वर्षीय अभिषेक श्रेष्ठ रहेका छन् । एक युवकको परिचय खुलिनसकेको प्रहरीले जनाएको छ ।
उनीहरूलाई तत्काल धरानस्थित बीपी कोइराला स्वास्थ्य विज्ञान प्रतिष्ठान लगिएपनि चिकित्सकले मृत घोषित गरेका हुन् । प्रत्यक्षदर्शीका अनुसार ती युवकको घाँटी र छातीमा गोली लागेको थियो ।
प्रत्यक्षदर्शीहरूका अनुसार जिल्ला प्रशासन कार्यालय सुनसरीले प्रदर्शनलाई नजरअन्दाज गर्दा सो घटना भएको छ ।
‘विद्यार्थीहरूको आन्दोलन भएकै कारण प्रहरी पनि थोरै संख्यामा खटाइनु र प्रदर्शनले उग्ररुप नलिदाँसम्म बेखबरजस्तै बन्नु प्रशासनको नजरअन्दाज हो,’ एक प्रत्यक्षदर्शीले भने, ‘उपमहानगरमा भीड पसेको दुई घण्टासम्म थप सुरक्षाकर्मी परिचालन नगर्नु र आगजनीपछि गोली चलाएर सरकारले नागरिकको हत्या गरेको छ ।’
खासगरी सुनसरी प्रशासनले सुरुमै बाक्लो मात्रामा सुरक्षाकर्मी परिचालन गरी भीडलाई संयमित बनाएको भए उक्त घटना नहुने उनले उदृत गरे । प्रहरीले अन्धाधुन्दा गोली चलाउँदा दुई युवकको आँखै अघि निधन भएको उनले उदृत गरे ।
अनिश्चितकालीन कर्फ्यु
यसैबीच प्रशासनले अनिश्चितकालीन कर्फ्यु आदेश जारी गरेको छ । प्रमुख जिल्ला अधिकारी धम्रेन्द्र कुमार मिश्रले अर्को सूचना जारी नभएसम्म कर्फ्यु आदेश जारी गरेका हुन् ।
Discussion about this post