इटहरी : जिल्ला प्रशासन कार्यालय मोरङले तिहार र छठ पर्व शान्तिपूर्ण रूपमा मनाउन आग्रह गरेको छ ।
साथै प्रशासनले भुईचम्पा, आतिशबाजी, प्लाष्टिकजन्य फूलमाला, पटकाजस्ता विस्फोटक पदार्थ कानूनद्वारा निषेधित वस्तुको अवैध आयात, ओसारपसार, संचय, बिक्री वितरण, प्रयोग नगर्न आग्रह गरेको छ ।
प्रमुख जिल्ला अधिकारी इन्द्रदेव यादवद्धारा जारी सूचनामा भनिएको छ, ‘मौलिक परम्परा, संस्कृति र प्रचलित कानूनको पालना गरी भयरहित वातावरणमा निर्धक्क भई पारस्परिक सद्भाव, एकता र मित्रता सुदृढ गर्दै हर्षोल्लासका साथ सबै नागरिकबीच आपसी सहयोग, सम्मान र सामाजिक अनुशासनको पालना गर्दै पर्व मनाउदा समाजलाई अझ गतिशील, सभ्य र ऐक्यवद्ध बनाउन सकिन्छ भन्ने मान्यताका साथ सम्पूर्ण जिल्लाबासी तथा सम्बद्ध निकायहरूले तिहार, छठ पर्व मनाउने क्रममा देहाय बमोजिम गर्नु, गराउनु हुन अनुरोध गरिन्छ ।’
प्रशासनले ९ वटा बुँदामा सूचना जारी गरेको छ । सूचनाअनुसार देउसीभैलो, नाचगानजस्ता कार्यक्रमहरू मर्यादित एवं अनुशासित रूपमा रातको १० बजेसम्म मात्र संचालन गर्न आग्रह गरेको छ ।
यसैगरी मैनबत्ती, दियो तथा विद्युतीय उपकरणहरूको प्रयोग सावधानीपूर्वक गर्न आग्रह गरिएको छ । चाडबाडको बहानामा धार्मिक, जातीय वा सामाजिक सदभावमा खलल पुन्याउने कुनै पनि गतिविधि साथै
‘मनोरञ्जनको नाममा गैर कानूनी रूपमा चिड्डा, जुवातास, कौडा, लंगुरबुर्जा, सट्टाबाजीजस्ता कानूनले निषेध गरेका क्रियाकलापहरू नगर्ने, नगराउने, सवारी साधनको क्षमताभन्दा बढी यात्रु नबोक्ने, मादक पदार्थ सेवन गरी सवारी साधन नचलाउने, तोकिएको भाडादरभन्दा बढी भाडा नलिने, ट्राफिक नियमको पालना गर्ने, गराउने, यात्रुलाई कुनै सहयोग आवश्यक परे वा गुनासो भएमा नजिकैको यात्रु सहायता कक्ष वा प्रहरी युनिटमा सम्पर्क गर्नु,’ सूचनामा भनिएको छ ।
यसैगरी भीडभाड हुने स्थानमा होहल्ला र हुलदंगा नगरी सभ्य र मर्यादित ढंगले चाडवाड मनाउन, चोरीडकैती लगायतका अन्य आपराधिक गतिविधिहरूबाट बच्नको लागि घर तथा अन्य सम्पत्तिको सुरक्षा सम्बन्धमा सचेत रहनसमेत आग्रह गरिएको छ ।
चाडबाडको समयमा आपूर्ति, स्वास्थ्य, खानेपानी, विद्युत, टेलिकम लगायतका अत्यावश्यक सेवा सुचारु गर्ने, यसका लागि जिल्लामा उपलब्ध जनशक्ति र स्रोत साधन (एम्बुलेन्स, स्वास्थ्यकर्मी, स्काभेटर) सम्बद्ध निकायले तयारी अवस्थामा राख्नसमेत आग्रह गरिएको छ ।
यसैगरी कानुन विपरीतका कार्य गरे, गराएको भए गरेमा नजिकैको सुरक्षा निकायमा जानकारी गराउनुसमेत अनुरोध गरिएको छ ।
Discussion about this post