झापा : झापामा जेनजी आन्दोलनका क्रममा भएको आगजनी, तोडफोड र लुटपाट घटनामा संलग्न व्यक्तिहरूको तस्बीर सार्वजनिक गर्दै प्रहरीले खोजी कार्य तीव्र पारेको छ ।
कोशी प्रदेश प्रहरी कार्यालय विराटनगरले सामाजिक सञ्जालमार्फत सीसीटीभी फुटेज र प्रत्यक्षदर्शी भिडियोका आधारमा अभियुक्तहरूको पहिचान गरी उनीहरूलाई नियन्त्रणमा लिने प्रक्रिया सुरु गरेको जनाएको छ ।
जेनजी आन्दोलनका क्रममा इलाका प्रहरी कार्यालय अनारमनी, इलाका प्रहरी कार्यालय सुरुङ्गा, इलाका प्रहरी कार्यालय दमक, र जिल्ला ट्राफिक प्रहरी कार्यालय झापामा भएको आगजनी, हातहतियार लुटपाट र पोशाक चोरी घटनामा संलग्नहरू पहिचान गर्न प्रहरीले तस्बिर सार्वजनिक गरेको हो ।
जिल्ला प्रहरी कार्यालय झापाका प्रवक्ता डीएसपी खगेन्द्रबहादुर खड्काका अनुसार सिसीटीभी फुटेज र सामाजिक सञ्जालमा भाइरल भएका भिडिओका आधारमा अभियुक्तहरूको पहिचान गरिएको छ। अहिले पक्राउ कार्य तीव्र रूपमा भइरहेको उनले बताए ।
१४ जना पक्राउ, दुई गोलीसहित नियन्त्रणमा
प्रहरीका अनुसार हालसम्म झापा जिल्लाभित्रबाट १४ जना अभियुक्त नियन्त्रणमा लिइएको छ ।
पक्राउ परेकामध्ये बिर्तामोड–५ का नवराज राई, राजन चौधरी, आयूष धिमाल, कनकाई–१ का गोपाल सङ्ग्रौला, कनकाई–३ का विष्णु विक, शिवसताक्षी–१० का कुशल तिम्सिना र सञ्जय बस्नेत, बिर्तामोड–५ की पूजा मगर, अर्जुनधारा–७ का सुरज राई, दमक–३ का रियाज सिलवाल, इलाम चुलाचुली–३ का नकुल अधिकारी र पाँचथर मिक्लाजुङ–५ का साजन ल्हागुन रहेका छन् ।
यसैबीच, प्रहरीले आज (बुधवार) थप दुई जना व्यक्तिलाई गोलीसहित पक्राउ गरेको जनाएको छ ।
पक्राउ पर्नेमा बाह्रदशी गाउँपालिका–४ चकचकीकी २७ वर्षीया इस्रप खातुन र बिर्तामोड–२ रामचोकका २२ वर्षीय विकास टुडु रहेका छन् । प्रहरीले उनीहरूको साथबाट ५४ थान गोली बरामद गरेको जनाएको छ ।
यसअघि पक्राउ परेकाहरूविरुद्ध आपराधिक उपद्रव र ज्यान मार्ने उद्योगसम्बन्धी मुद्दा दर्ता गरिएको छ ।
जिल्ला प्रशासन कार्यालय झापाका अनुसार भदौ २४ गतेको आन्दोलनका क्रममा १५२ वटा भौतिक संरचनामा क्षति पुगेको छ ।
आन्दोलनका क्रममा लुटिएका ९९ थान हतियारमध्ये ७७ थान फिर्ता भइसकेका छन् भने २२ थान अझै फिर्ता हुन बाँकी छन् ।
प्रहरीले बाँकी हतियार र संलग्न व्यक्तिहरूको खोजीका लागि विशेष टोली खटाएको जनाएको छ ।
Discussion about this post