इटहरीमा शब्दको पर्व, पाठकका लागि घुम्ती साहित्य उत्सव

इटहरी : शनिबार इटहरीमा कवि, लेखक तथा पाठकहरूले एकैठाउँ साक्षात्कार गरेका छन् ।

लेखक, पाठक र सिर्जनालाई एउटै मञ्चमा जोड्ने उद्देश्यसहित आयोजित ‘फाइनप्रिन्ट फिभरः घुम्ती साहित्य उत्सव’ आयोजना गरिएको हो । जसले इटहरीलाई दिनभर साहित्यिक उत्सवमय बनायो ।

पूर्वका पाठकलाई केन्द्रमा राखेर आयोजना गरिएको उत्सवमा फाइनप्रिन्टद्धारा प्रकाशित ६ वटा पुस्तकमाथि संवाद आयोजना गरियो ।

महानायक राजेश हमालको आत्मकथात्मक पुस्तक युगदेखि युगसम्म माथि प्रसिद्ध कवि मनु मञ्जिलले संवाद गरे ।

कार्यक्रमको अन्त्यमा भएको उक्त सेसनले आम दर्शक, पाठकको ध्यान केन्द्रीत गर्यो । संवादमा हमालको जीवन, प्रेम, कला, समय र सार्वजनिक व्यक्तित्वभित्रको निजी यात्रामाथि चर्चा गरियो ।

यसैगरी २०८१ सालको मदन पुरस्कार विजेता उपन्यास उरमालका लेखक छुदेन काविमोसँग नाट्यकर्मी प्रज्वल पराजुलीले सहजीकरण गरे । छुदेनले कविता र उपन्यासलाई ‘सबैलाई सजाउने फूल’ का रूपमा व्याख्या गरे ।

डा. नवराज केसीको स्वस्पर्श पुस्तक केन्द्रित संवादमा जीवन, पीडा र आनन्दका तहहरू खुलाइए ।

नाट्यकर्मी सोनु जयन्तीको सहजीकरणमा केसीले जीवनलाई ‘अलिक परबाट हेर्ने दृष्टि’ विकास गर्नुपर्ने बताए । खासगरी मानिको शब्द पढ्दा निःशब्द बन्ने अवस्थामा नै त्यही पात्र कथा बन्ने उदृत गरे ।

बालरोग विशेषज्ञका रूपमा कर्णालीमा कार्यरत डा. केसीले मानिसलाई दुःखका लागि अनेक कारण रहेको भएपनि जीवनभित्र खुशी खोज्नुपर्ने बताए ।

यसैगरी पद्यश्री पुरस्कार विजेता कृति छालबाटोका लेखक रमेश भुसालसँग डा. अस्मिता विष्टले संवाद गरिन् ।

यस्तै, ददि सापकोटाको ज्ञानिकामाथि पत्रकार मिलन बुढाथोकीले सहजीकरण गरे । सुबिन भट्टराईको कृति चमेलीको फूल र बैजनी रुमालमाथि कवि धीरज राईले संवाद सञ्चालन गरे ।

कार्यक्रमको पहिलो चरणमा भने ११ जना कविहरूले कविता प्रस्तुत गरे ।

धीरज राई, टीका आत्रेय, तीर्थराज विश्वकर्मा, शुभलक्ष्मी लम्साल, विवेक विवश रेग्मी, अस्मिता विष्ट, अमित थेबे, सकुन्तला मञ्जरी, सुदीप पाख्रिन, मनु मञ्जिल र देवान किरातीका कविताले मञ्चलाई भावनात्मक बनायो ।

कवि बद्री भिखारीको अध्यक्षतामा भएको कार्यक्रममा फाइनप्रिन्टका सञ्चालक नीरज भारीले आफ्नो प्रकाशनका पाठक सबैभन्दा धेरै पूर्वमा रहेको बताउँदै पाठकप्रतिको सम्मानस्वरूप घुम्ती साहित्य उत्सव आयोजना गरिएको बताए ।

शब्द प्रवाह र काव्य डबलीको सहकार्यमा भएको कार्यक्रममा केआईईसीले सहयोग गरेको थियो ।