इटहरी : कोशी प्रदेशका विभिन्न जिल्लामा प्रहरीले छुट्टाछुट्टै कारबाही गर्दै लागूऔषध ब्राउनसुगर, गाँजा तथा प्रतिबन्धित औषधीसहित १४ जनालाई पक्राउ गरेको छ।
प्रहरीले कोशी प्रदेशका विभिन्न जिल्लाबाट दैनिकजसो लागूऔषध कारोबारीलाई नियन्त्रणमा लिने गरेको तथ्यांकले देखाएको छ।
झापा, सुनसरी र इलामबाट मात्रै ब्राउनसुगरसहित १२ जना पक्राउ परेका छन्। भद्रपुर नगरपालिका–४ बाट १६ ग्राम ५१० मिलिग्राम ब्राउनसुगरसहित पाँचथर फिदिमका भीमराज खजुम, राजमान राई, लक्ष्मण लिम्बु र भद्रपुर–५ का सुमन मुखिया पक्राउ परेका छन्।
त्यसैगरी झापा गाउँपालिका–४ बाट मदन मिश्र ३ ग्राम ८९ मिलिग्राम ब्राउनसुगरसहित पक्राउ परेका छन् भने धरान–८ बाट तुफान विश्वकर्मा ३ ग्राम ९३० मिलिग्राम ब्राउनसुगरसहित पक्राउ परेका छन्।
कोशी गाउँपालिका–१ बाट जीवन कार्की, अनिल राजधामी, राजेश चौधरी र नविन चौधरीलाई २ ग्राम १९ मिलिग्राम ब्राउन सुगरसहित नियन्त्रणमा लिइएको छ। यस्तै, इलाम नगरपालिका–९ बाट सुधिर अधिकारी र पार्वता चौहान अधिकारी १ ग्राम ५ मिलिग्राम ब्राउनसुगरसहित पक्राउ परेका छन्।
यसैबीच, बेलका नगरपालिका–८ मा चेकजाँचका क्रममा अटोबाट २७ किलोग्राम गाँजासहित चालक अशोक राई पक्राउ परेका छन्।
उता विराटनगर महानगरपालिका–१५ बाट ९० ट्याब्लेट निट्राजेपामसहित सुदिप उराउ पक्राउ परेका छन्। साथै उर्लाबारी–९ स्थित एक घरबाट विभिन्न प्रकारका लागूऔषध क्याप्सुल १४० र ४८५ ट्याब्लेट बरामद गरिएको प्रहरीले जनाएको छ।
पक्राउ परेकामाथि लागूऔषध सम्बन्धी मुद्दा दर्ता गरी थप अनुसन्धान भइरहेको प्रहरीले जनाएको छ।
Discussion about this post