इटहरी : कोशी प्रदेशसभामा सरकारको नीति तथा कार्यक्रमलाई लिएर सत्ता पक्ष र प्रतिपक्षबीचको विवाद चर्किँदा बुधबारको बैठक अवरुद्ध भएको छ।
प्रतिपक्षी दल नेपाली कम्युनिस्ट पार्टी (नेकपा)का सांसदहरूले संसदीय प्रक्रिया मिचिएको आरोप लगाउँदै नाराबाजी गरेपछि बैठक शनिबारसम्मका लागि स्थगित गरिएको हो।
विवादको केन्द्रमा सभामुख अम्बरबहादुर विष्टले सरकारको नीति तथा कार्यक्रम ‘सर्वसम्मत’ रूपमा पारित भएको घोषणा गर्नु बनेको छ।
प्रतिपक्षी सांसदहरूको भनाइमा उनीहरूलाई संशोधन प्रस्ताव दर्ता गर्ने पर्याप्त समय नदिई प्रक्रिया अघि बढाइएको थियो। त्यसैकारण बुधबारको बैठक सुरु भएलगत्तै नेकपाका सांसदहरूले विरोध जनाएका थिए।
विरोधका क्रममा पूर्वमुख्यमन्त्री तथा नेकपा सांसद राजेन्द्र कुमार राई रोष्ट्रमसम्म पुगेका थिए। उनले आफू बोल्नका लागि रोष्ट्रममा गएको दाबी गरे पनि मर्यादापालकले रोकेपछि तनाव बढेको थियो। सो क्रममा रोष्ट्रममा रहेको माइक खोसाखोस हुँदा भाँचिएको बताइएको छ।
विपक्षी सांसदहरूले नीति तथा कार्यक्रममा असहमति जनाउँदै संशोधन हाल्ने तयारी गरेका थिए। “हामीले विपक्षमा मतदान गरेका थियौँ, संशोधन हाल्ने समय मागेका थियौँ, तर त्यो अवसर दिइएन,” राईले भने।
प्रतिपक्षी दलका नेता इन्द्रबहादुर आङ्बोले पनि सभामुख स्वयं गतिरोध अन्त्यतर्फ गम्भीर नदेखिएको आरोप लगाए। सत्ता पक्षबाट प्रतिपक्षलाई सम्बोधन गरेर अघि बढ्ने प्रस्ताव आए पनि सभामुखले त्यसलाई निष्कर्षमा नपुर्याएको उनको भनाइ थियो।
यता सभामुख अम्बरबहादुर विष्टले भने तोकिएको समयभित्र कुनै पनि संशोधन प्रस्ताव दर्ता नभएकाले प्रक्रिया अनुसार नीति तथा कार्यक्रम पारित गरिएको स्पष्ट पारेका छन्।
उनले संसद्को अभिलेखमा नीति तथा कार्यक्रम प्रतिपक्षको असहमतिसहित बहुमतबाट पारित भएको उल्लेख गरिएको जानकारी पनि दिएका छन्।
प्रदेशसभा सञ्चालन नियमावलीको दफा ३७ अनुसार सांसदहरूले संशोधन प्रस्ताव हाल्न सक्ने व्यवस्था भए पनि ‘सभामुखले उपयुक्त ठहर गरेमा’ मात्र संशोधन अघि बढ्ने व्याख्यालाई लिएर पनि विवाद देखिएको छ। प्रतिपक्षी दलले यही बुँदालाई लिएर प्रक्रियामाथि प्रश्न उठाएको हो।
नीति तथा कार्यक्रम पारित हुँदा प्रतिपक्षी सांसदहरू चुप बसेको तर पारित भइसकेपछि मात्रै विरोधमा उत्रिएको भन्दै सत्ता पक्षका सांसदहरूले प्रतिपक्षमाथि उल्टै प्रश्न उठाएका छन्। तर नेकपाले भने प्रक्रिया नै अपारदर्शी भएकाले आफूहरू बाध्य भएर विरोधमा उत्रिनुपरेको दाबी गरेको छ।
लगातारको नाराबाजी र अवरोधपछि सभामुखले बैठक आधा घण्टाका लागि स्थगित गरेका थिए।
त्यसपछि सभामुखको पहलमा सत्ता र प्रतिपक्षबीच छलफल भए पनि सहमति जुट्न सकेन। अन्ततः प्रदेशसभा बैठक जेठ १६ गते शनिबारसम्मका लागि स्थगित गरिएको छ।
Discussion about this post