इटहरी : राष्ट्रिय स्वतन्त्र पार्टी (रास्वपा)को प्रथम सुनसरी जिल्ला अधिवेशनमा मतदान अधिकार कटौती गरिएको आरोपपछि विवाद उत्पन्न भएको छ।
कोशी गाउँपालिका–१ स्थित लौकही सिटी हलमा जारी अधिवेशनमा केही समय तनावपूर्ण अवस्था सिर्जना भएको हो।
असन्तुष्ट पक्षका कार्यकर्ताले अधिवेशनमा मतदान गर्ने अधिकारबाट आफूहरूको नाम अन्तिम समयमा हटाइएको भन्दै विरोध जनाएका छन्। विरोधस्वरूप केही युवा कार्यकर्ताले बन्दसत्र हलको मूल प्रवेशद्वारमै धर्ना दिएका थिए।
विरोधरत कार्यकर्तालाई हटाएर निर्वाचन प्रक्रिया अघि बढाउन खोजिएपछि कार्यकर्ता र आयोजक पक्षबीच चर्काचर्की भएको प्रत्यक्षदर्शीहरूले बताएका छन्। असन्तुष्ट पक्षले हात हालाहालसमेत भएको दाबी गरेको छ।
जिल्ला प्रहरी कार्यालय सुनसरीका प्रवक्ता डीएसपी चन्द्र खड्काका अनुसार केही समय होहल्ला र विवाद भए पनि कुनै झडपको अवस्था सिर्जना हुन पाएन।
‘केही बेर होहल्ला भएको थियो। अहिले अवस्था पूर्ण रूपमा सामान्य छ र मतदान प्रक्रिया सञ्चालन भइरहेको छ,’ खड्काले बताए।
अधिवेशनमा प्रतिनिधि छनोट र मतदान अधिकारसम्बन्धी विवाद सतहमा आएपछि रास्वपाभित्रको आन्तरिक असन्तुष्टि सार्वजनिक भएको देखिएको छ। यद्यपि, पार्टी नेतृत्वले निर्वाचन प्रक्रिया निर्धारित कार्यतालिकाअनुसार अघि बढिरहेको जनाएको छ।
अधिवेशनबाट जिल्ला सभापतिका लागि सागर दाहाल, मोहन निरौला, चक्रबहादुर विष्ट र कृष्ण रौनियार चुनावी प्रतिस्पर्धामा छन् ।
Discussion about this post