ताप्लेजुङ : लामो समयदेखि विवादको केन्द्र बनेको ताप्लेजुङको ऐतिहासिक तथा धार्मिक क्षेत्र मुक्कुम्लुङ–पाथीभरा केवलकार निर्माण परियोजनालाई सहमतिमार्फत टुंग्याउने उद्देश्यले सरकारले सात सदस्यीय कार्यदल गठन गरेको छ।
प्रधानमन्त्री तथा मन्त्रिपरिषद् कार्यालयको सचिवस्तरको बिहीबारको निर्णयअनुसार प्रधानमन्त्रीका सामाजिक विकास विज्ञ विश्व राईको संयोजकत्वमा गठन गरिएको कार्यदललाई केवलकार निर्माणका विषयमा देखिएका विवाद र असहमतिका कारण पहिचान गरी १५ दिनभित्र समाधानका उपायसहित सुझाव प्रतिवेदन बुझाउने जिम्मेवारी दिइएको छ।
प्रधानमन्त्रीका प्रेस तथा अनुसन्धान विज्ञ दीपा दाहालका अनुसार कार्यदलमा केवलकार निर्माणप्रति असहमति जनाउँदै आएका पक्ष, निर्माण कम्पनी, पाथीभरा क्षेत्र विकास समिति, पूर्वाधार विकास मन्त्रालय, गृह मन्त्रालय तथा प्रधानमन्त्री सचिवालयका प्रतिनिधिलाई समेटिएको छ।
सरकारको यो कदमलाई विवाद समाधानका लागि सबै सरोकारवालालाई एउटै मञ्चमा ल्याउने प्रयासका रूपमा हेरिएको छ।
मुक्कुम्लुङ–पाथीभरा क्षेत्रमा केवलकार निर्माणको विषय लामो समयदेखि धार्मिक, सांस्कृतिक, वातावरणीय तथा विकाससम्बन्धी बहसको केन्द्रमा रहँदै आएको छ।
परियोजनाको पक्षमा पर्यटन पूर्वाधार विस्तार र तीर्थयात्रुलाई सहज पहुँचको तर्क प्रस्तुत हुँदै आएको छ भने विरोधी पक्षले मुक्कुम्लुङको सांस्कृतिक तथा मौलिक पहिचान संरक्षणको माग गर्दै निर्माण रोक्नुपर्ने अडान राख्दै आएको छ।
सरकारले गठन गरेको कार्यदलले यी सबै पक्षको धारणा समेटेर सहमतिमा आधारित समाधानको खाका प्रस्तुत गर्न सके विवाद समाधानतर्फ महत्वपूर्ण कदम हुने अपेक्षा गरिएको छ।
Discussion about this post