इटहरी : यही असार २७ गते हुने इटहरी उद्योग वाणिज्य संघको निर्वाचनलाई लक्षित गर्दै अध्यक्षका उम्मेदवार नवराज काफ्ले नेतृत्वको साझा समूहले व्यवसायीको घरदैलो अभियानलाई तीव्र बनाएको छ।
समूहका उम्मेदवारहरूले विभिन्न क्षेत्रका उद्योगी तथा व्यवसायीलाई भेट्दै आफ्नो चुनावी एजेन्डा प्रस्तुत गर्नुका साथै मत मागिरहेका छन्। घरदैलो अभियानका क्रममा व्यवसायीबाट सकारात्मक प्रतिक्रिया र साथ प्राप्त भइरहेको समूहको दाबी छ।
अध्यक्षका उम्मेदवार नवराज काफ्लेले दिनप्रतिदिन बढ्दै गएको उत्साहले आफ्नो चुनावी अभियानलाई थप सशक्त बनाएको बताए। व्यवसायीको माया, साथ र विश्वासले साझा समूहप्रति नयाँ ऊर्जा थपिएको उनको भनाइ छ।
काफ्लेले उद्योगी–व्यवसायीको हकहित संरक्षण, व्यवसायमैत्री वातावरण निर्माण तथा इटहरी उद्योग वाणिज्य संघलाई सबै व्यवसायीको साझा संस्थाका रूपमा अघि बढाउने प्रतिबद्धता व्यक्त गरे।
घरदैलो अभियानका क्रममा उनले उद्योगी–व्यवसायीलाई अध्यक्षसहित साझा समूहका सम्पूर्ण उम्मेदवारलाई मतदान गरी सहयोग गर्न आग्रह गरेका छन्।
संघको नयाँ नेतृत्व चयनका लागि असार २७ गते निर्वाचन हुँदैछ। जसका लागि काफ्ले र गायत्री कटवाल भण्डारीबीच अध्यक्षमा प्रतिस्पर्धा हुँदैछ। निर्वाचनलाई लक्षित गर्दै दुवै समूहले यतिबेला प्रचारप्रसार र घरदैलो अभियानलाई तीव्र बनाएको जनाएका छन्।
Discussion about this post