इटहरी : सुनसरी प्रहरीले छुट्टाछुट्टै स्थानमा सञ्चालन गरेको चेकजाँचका क्रममा ब्राउनसुगरसहित चार जनालाई पक्राउ गरेको छ। पक्राउ पर्नेमा तीन जना किशोरसमेत रहेका छन्।
अस्थायी प्रहरी पोस्ट बसपार्क इनरुवाबाट खटिएको प्रहरी टोलीले शुक्रबार साँझ करिब ७ः३० बजेतिर इनरुवा नगरपालिका–४ ट्याक्सी स्ट्यान्डस्थित पूर्व–पश्चिम राजमार्गमा पैदल हिँडिरहेका तीन जनालाई शंका लागी जाँच गर्दा उनीहरूको साथबाट २.६५ ग्राम ब्राउनसुगर बरामद गरेको प्रहरीले जनाएको छ।
पक्राउ पर्नेमा इटहरी उपमहानगरपालिका–१७ का १६ वर्षीय सुशान्त चौधरी, १८ वर्षीय अरमान खान र १८ वर्षीय सक्सेस दास रहेका छन्। उनीहरूलाई लागूऔषधसहित नियन्त्रणमा लिई जिल्ला प्रहरी कार्यालय सुनसरीमा थप अनुसन्धान भइरहेको प्रहरीले जनाएको छ।
यसैगरी, शुक्रबार बिहान करिब ११ बजे इलाका प्रहरी कार्यालय लौकहीबाट खटिएको प्रहरी टोलीले कोशी गाउँपालिका–१ लौकही बजारमा भारतबाट नेपालतर्फ आउँदै गरेको बीआर ३८ भी ०७८४ नम्बरको मोटरसाइकल रोकी जाँच गर्दा सिटमुनि लुकाइछिपाइ राखिएको अवस्थामा १.८२ ग्राम ब्राउनसुगर फेला पारेको थियो।
प्रहरीले लागूऔषध, मोटरसाइकलसहित चालक कोशी गाउँपालिका–६ का ४० वर्षीय सुरेन्द्र महतोलाई पक्राउ गरेको छ। घटनाबारे जिल्ला प्रहरी कार्यालय सुनसरीले थप अनुसन्धान अघि बढाएको जनाएको छ।
Discussion about this post