इटहरी : लोपोन्मुख नभए पनि नेपालका सिमसार क्षेत्रमा पाइने आकर्षक जलचर चरा जल अप्सरा लामो समयपछि सुनसरीको तरहरामा पुनः देखिएको छ।
तर उपयुक्त बासस्थानको अभावका कारण चरा केही समयमै त्यहाँबाट उडेर जाने गरेको संरक्षणकर्मीहरूले बताएका छन्।
जल अप्सरा सामान्यतयाः ताल र सिमसार क्षेत्रमा बस्न रुचाउने चरा हो।
विगतमा इटहरी–२० तरहराका सिमसारमा यस्ता वनस्पतिहरू प्रशस्त रहेकाले यो प्रजाति नियमित रूपमा देखिन्थ्यो। पछिल्ला वर्षहरूमा भने जलकुम्भी अत्यधिक फैलिँदा कमल र कुमुदिनीजस्ता तलाउमा तैरिने वनस्पतिको क्षेत्र साँघुरिँदै गएको छ।
संरक्षणकर्मी निशान शर्माका अनुसार हाल अधिकांश सिमसार जलकुम्भीले ढाकिएकाले जल अप्सराका लागि आवश्यक आहार र बासस्थान दुवै प्रभावित भएका छन्।
मंगलबार यस क्षेत्रमा देखिएको उक्त जल अप्सरा पनि लामो समय नबसी अन्यत्र उड्न सक्ने अनुमान गरिएको छ।
चराविज्ञहरूले स्थानीय सिमसारको संरक्षण, जलकुम्भीको वैज्ञानिक व्यवस्थापन तथा कमल र कुमुदिनीजस्ता स्थानीय जलवनस्पतिको पुनर्स्थापनामा ध्यान दिन सके जलअप्सरासहित अन्य जलचर चराहरूको बासस्थान पुनः सुरक्षित बनाउन सकिने बताएका छन्।
उनीहरूका अनुसार तरहराको सिमसार जैविक विविधताको महत्वपूर्ण आश्रयस्थल भएकाले यसको संरक्षणमा स्थानीय तह र सरोकारवाला निकायको सक्रियता आवश्यक छ।
Discussion about this post