इटहरी : देवानगन्ज गाउँपालिका–३, कप्तानगन्ज घटनामा मृत्यु भएका रवीन्द्रकुमार मेहताको शव नेपाली सेनाको हेलिकोप्टरबाट गाउँ लैजाने सहमति भएको छ।
रवीन्द्रका परिवार र सरकारबीच भएको सातबुँदे सहमतिअनुसार मेहतालाई सहिद घोषणा गर्ने प्रक्रिया तत्काल अघि बढाइने भएको हो। सहमतिपछि लामो समयदेखि त्रिवि शिक्षण अस्पतालमा रहेको उनको शव गाउँ लगेर दाहसंस्कार गर्ने बाटो खुलेको छ।
गृहमन्त्री सुधन गुरुङ र मेहताका अभिभावकबीच भएको सहमतिमा घटनाको निष्पक्ष तथा प्रभावकारी छानबिन गरी दोषीमाथि कानुनअनुसार कारबाही अघि बढाउने उल्लेख छ।
सरकारले मृतक परिवारका एक योग्य सदस्यलाई रोजगारी उपलब्ध गराउन आवश्यक पहल गर्ने भएको छ। त्यस्तै, घटनाको अध्ययन गर्न गठित छानबिन समितिले दिने सुझाव तथा सिफारिस कार्यान्वयनका लागि प्रक्रिया अघि बढाउने सहमति भएको छ।
सहमतिअनुसार कप्तानगन्जस्थित मदरसाको कानुनी हैसियत तथा सम्बन्धित विषयमा समेत तत्काल छानबिन सुरु गरिनेछ।
कप्तानगन्ज घटनामा मृत्यु भएका तीनजनाको सम्झनामा स्थानीय सरकारसँगको समन्वयमा यसै वर्ष स्मृति पार्क निर्माणका लागि बजेट विनियोजन गर्ने सहमति पनि भएको छ।
यसअघि रवीन्द्रको शव पोस्टमार्टम गर्ने विषयमा परिवार र सरकारबीच सहमति जुट्न नसक्दा शव शिक्षण अस्पतालमै रहेको थियो। परिवारले सहिद घोषणा र दोषीलाई कारबाहीको माग गर्दै आएका थिए।
Discussion about this post