इटहरी : इटहरीमा खसीको भन्दै बाख्राको मासु बिक्री गर्न लागेको आरोपमा नगर प्रहरीले २१ किलो मासु बरामद गरेको छ ।
इटहरी–१७ पकलीबाट ल्याइएको उक्त मासु बसपार्क मोडको इटहरी मिट सेन्टरमार्फत सोल्टी होटलमा पठाउन लागिएको अवस्थामा नियन्त्रणमा लिइएको हो ।
मासुसँगै होटल गरिमा लिमिटेड (सोल्टी होटल)को नाममा काटिएको बिलसमेत फेला परेको नगर प्रहरीले जनाएको छ । बिलमा प्रतिकिलो १ हजार २५० रुपैयाँका दरले २१ किलो खसीको मासु उल्लेख छ।
प्रहरीका अनुसार ९१०३ नम्बरको मोटरसाइकलमा ल्याइएको मासु सिटी सफारीमार्फत सोल्टी होटलतर्फ लैजान लागिएको अवस्थामा नियन्त्रणमा लिइएको थियो ।
नेपाल प्रहरीले मासु नियन्त्रणमा लिएको केही समयपछि इटहरी उपमहानगरपालिकाको नगर प्रहरीको टोली घटनास्थल पुगेको थियो ।
इटहरीका नगर प्रहरी प्रमुख जेबी राईका अनुसार अबदेखि बाख्राको मासु नबेच्ने शर्तमा पसल सञ्चालकलाई कागज गराएर छाडिएको छ । राईले बाख्राको मासु बिक्री गर्न प्रतिबन्ध नभए पनि त्यसलाई खसीको मासु भन्दै बिक्री गर्न नपाइने बताए ।
उनले भने, “अबदेखि यस्तो काम नगर्ने भन्दै इटहरी मिट सेन्टरका सञ्चालक इटहरी–१७ पकली निवासी अब्दुल खानले रोइकराइ गर्नुभयो । मैले पनि कागज गरेर छाडिदिएँ ।”
सोल्टी होटल व्यवस्थापनले भने आफूहरूलाई बाख्राको मासु खसीको भन्दै पठाइएको विषयमा जानकारी नभएको दाबी गरेको छ ।
उपभोक्ताको हितमाथि खेलवाड गर्ने मासु पसलेलाई कारबाही नगरी छाडिनु र चाडपर्वको समयमा हुने बजार अनुगमनको प्रभावकारितामाथि समेत प्रश्न उठेको छ ।
भिडियो
Discussion about this post