इटहरी : मोरङ र उदयपुरमा भएका छुट्टाछुट्टै सडक दुर्घटनामा तीन जनाको मृत्यु भएको छ भने पाँच जना घाइते भएका छन् ।
मोरङको बूढीगंगा गाउँपालिका–२ स्थित कोशी लोकमार्गमा मोटरसाइकलले साइकललाई ठक्कर दिँदा मोटरसाइकलमा सवार सिरहाको लहान नगरपालिका–३ का १८ वर्षीय डाइमण्डकुमार कुशवाहाको मृत्यु भएको छ ।
विराटनगरबाट नेमुवातर्फ जाँदै गरेको कोशी प्रदेश ०२–०६१ प ७८५२ मोटरसाइकलले नेमुवाबाट रबि चोकतर्फ जाँदै गरेको साइकललाई ठक्कर दिएको प्रहरीले जनाएको छ ।
दुर्घटनामा गम्भीर घाइते कुशवाहालाई विराट टिचिङ अस्पतालमा उपचारका क्रममा बिहान ६ः२६ बजे चिकित्सकले मृत घोषणा गरेका थिए ।
मोटरसाइकलमा सवार लहान–२ का १७ वर्षीय राहुल कुशवाहा र साइकलयात्री सुनसरीको दुहबी नगरपालिका–१ का २२ वर्षीय साहजित मियाँ घाइते भएका छन् । दुवैको अवस्था सामान्य रहेको प्रहरीले जनाएको छ । सीसीटीभी फुटेजबाट मोटरसाइकल राहुलले चलाएको खुलेको प्रहरीले जनाएको छ ।
यसैगरी मोरङको धनपालथान गाउँपालिका–६ रंगकालीस्थित हुलाकी सडकमा दुई मोटरसाइकल ठोक्किँदा एक जनाको मृत्यु भएको छ ।
रंगेलीबाट विराटनगरतर्फ जाँदै गरेको को १९ प ७७४७ नम्बरको मोटरसाइकल र विपरीत दिशाबाट आउँदै गरेको को १९ प २ नम्बरको मोटरसाइकल आपसमा ठोक्किँदा ७७४७ नम्बरका चालक विराटनगर महानगरपालिका–७ मिलन चोकका २२ वर्षीय दिलिप विक घाइते भएका थिए ।
उनको उपचारका क्रममा कोशी अस्पताल विराटनगरमा साँझ ७ बजे मृत्यु भएको प्रहरीले जनाएको छ ।
दुर्घटनामा अर्को मोटरसाइकलका चालक धनपालथान–५ का २५ वर्षीय रूपेश सरदार घाइते भएका छन् । उनको अवस्था सामान्य रहेको छ । दुवै मोटरसाइकल प्रहरीले नियन्त्रणमा लिएको छ ।
यस्तै उदयपुरको बेलका नगरपालिका–६ किराँत चोकस्थित मदन भण्डारी लोकमार्गमा ट्रक र मोटरसाइकल ठोक्किँदा दुई जना गम्भीर घाइते भएका छन् ।
इटहरीबाट गाईघाटतर्फ जाँदै गरेको को १ क ३४१८ नम्बरको ट्रकको अगाडिको टायर पञ्चर भएपछि अनियन्त्रित भएर विपरीत दिशाबाट आउँदै गरेको लु प्र ०२–००२ प २८५८ नम्बरको मोटरसाइकललाई ठक्कर दिएको थियो ।
दुर्घटनामा मोटरसाइकल चालक रोल्पाको स्युरी–३ का ५६ वर्षीय दले पुन मगर र पछाडि सवार दाङको घोराही उपमहानगरपालिका–१३ की करिब ४५ वर्षीया भानु पुन मगर गम्भीर घाइते भएका थिए ।
दुवैलाई बेलका नगर अस्पतालमा सामान्य उपचारपछि थप उपचारका लागि बीपी कोइराला स्वास्थ्य विज्ञान प्रतिष्ठान धरान पठाइएको थियो । उपचारकै क्रममा दले पुन मगरलाई अपराह्न ४ः५० बजे चिकित्सकले मृत घोषणा गरेका छन् ।
ट्रक सडकबाट करिब पाँच मिटर तल खसेर पल्टिएको थियो । ट्रक चालक मोरङको सुन्दरहरैँचा–३ का ४८ वर्षीय वीरेन्द्र उराव र सहचालक सुन्दरहरैँचा–५ का २२ वर्षीय आकाश पोखरेल भने सकुशल रहेका छन् ।
प्रहरीले ट्रक चालक र मोटरसाइकल नियन्त्रणमा लिएको जनाएको छ । सबै घटनाबारे थप अनुसन्धान भइरहेको कोशी प्रदेश प्रहरी कार्यालय विराटनगरले जनाएको छ ।
Discussion about this post