शुक्रबार कटारी नगरपालिका र रौतामाई गाउँपालिकाले लालपुर्जा वितरण गरेका छन् भने बिहीबार त्रियुगा नगरपालिकाले लालपुर्जा वितरण गरेको हो।
कटारी नगरपालिका–१ बेलस्रोतका १० परिवार र रौतामाई गाउँपालिका–७ मुर्कुचीका ५६ परिवारलाई शुक्रबार जग्गाधनी प्रमाणपुर्जा वितरण गरिएको छ। त्यसैगरी बिहीबार त्रियुगा नगरपालिका–५ का २७ परिवारले लालपुर्जा प्राप्त गरेका छन्।
कटारी नगरपालिका–१ बेलस्रोतमा आयोजित कार्यक्रममा नगरप्रमुख राजेशचन्द्र श्रेष्ठले १० भूमिहीन दलित तथा सुकुम्बासी परिवारलाई लालपुर्जा वितरण गरे। कार्यक्रममा बेलस्रोतका भूमिहीन दलित तथा सुकुम्बासी परिवारलाई जग्गाको स्वामित्व प्रदान गरिएको हो।
लालपुर्जा वितरण गर्दै नगरप्रमुख श्रेष्ठले आगामी दिनमा कटारी नगरपालिकाका अन्य वडामा रहेका भूमिहीन दलित, सुकुम्बासी तथा अव्यवस्थित बसोबासीलाई पनि जग्गाधनी प्रमाणपुर्जा वितरण गर्ने योजना रहेको बताए।
त्यसैगरी रौतामाई गाउँपालिका–७ मुर्कुची बजारमा आयोजित कार्यक्रममा गाउँपालिका अध्यक्ष वीरेन्द्रकुमार मगरले ५६ परिवारलाई लालपुर्जा वितरण गरेका थिए। उनले लामो समयको प्रयासपछि सुकुम्बासी परिवारले जग्गाको स्वामित्व प्राप्त गरेको भन्दै यसले उनीहरूको जीवनमा खुसी थप्ने बताए।
कार्यक्रममा प्रमुख जिल्ला अधिकारी, सुरक्षा निकायका प्रमुख, स्थानीय जनप्रतिनिधि तथा सर्वसाधारणको सहभागिता रहेको थियो।
यसैगरी त्रियुगा नगरपालिकाको आयोजना तथा जिल्ला भूमि समस्या समाधान समिति उदयपुरको समन्वयमा बिहीबार २७ भूमिहीन दलित तथा सुकुम्बासी परिवारलाई लालपुर्जा वितरण गरिएको थियो। नगरप्रमुख वसन्तकुमार बस्नेतको अध्यक्षता तथा उदयपुर क्षेत्र नम्बर १ का प्रतिनिधिसभा सदस्य पारसमणि गेलालको प्रमुख आतिथ्यतामा आयोजित कार्यक्रममा लालपुर्जा वितरण गरिएको हो।
दुई दिनमा तीन स्थानीय तहका ९३ परिवारले जग्गाको कानुनी स्वामित्व प्राप्त गरेपछि लामो समयदेखि भूमिहीन अवस्थामा रहेका परिवारलाई ठूलो राहत मिलेको छ।
Discussion about this post