इटहरी : त्रिभुवन विश्वविद्यालयले २०८३ मा सञ्चालन गरेको स्नातक तह बीबीएस चौथो वर्षको अन्तिम परीक्षामा नेपाल प्रथम हुन सफल प्रतिभा लुइटेलसहित उत्कृष्ट विद्यार्थीलाई सम्मान गरिएको छ ।
इटहरी–२० तरहरास्थित राष्ट्रिय जनसहयोग कलेजले आयोजना गरेको कार्यक्रममा ८७ दशमलव ८० प्रतिशत अङ्क प्राप्त गरी नेपाल प्रथम भएकी लुइटेलसहित विशिष्ट श्रेणी हासिल गर्ने १२ जना विद्यार्थीलाई नगदसहित सम्मान गरिएको हो । कार्यक्रममा बीबीएस र बीएड चौथो वर्ष उत्तीर्ण सम्पूर्ण विद्यार्थीलाई समेत बधाई तथा सम्मान गरिएको कलेजले जनाएको छ ।
कार्यक्रमका प्रमुख अतिथि इटहरी उपमहानगरपालिकाका कार्यवाहक प्रमुख मणिराम श्रेष्ठले विद्यार्थीको सफलता कलेज, अभिभावक र समग्र इटहरीका लागि गौरवको विषय भएको बताए ।
क्याम्पस प्रमुख द्रोणबहादुर न्यौपानेले गुणस्तरीय शिक्षा र उत्कृष्ट शैक्षिक नतिजालाई प्राथमिकतामा राख्दै आएको बताए ।
कलेज सञ्चालक समितिका अध्यक्ष खगेन्द्र गिरीले विद्यार्थीको मेहनत, शिक्षकको मार्गदर्शन र अभिभावकको सहयोगले उत्कृष्ट नतिजा हासिल भएको उल्लेख गर्दै सम्मानित विद्यार्थीलाई उज्ज्वल भविष्यको शुभकामना दिएका थिए ।
















Discussion about this post