इटहरी : राष्ट्रिय फोटो पत्रकार समूह सुनसरी शाखाको अध्यक्षमा पुनः गुरु ढकाल निर्वाचित भएका छन् ।
ढकाल यसअघि पनि अध्यक्ष रहेका थिए । यसैगरी उपाध्यक्षमा खेमराज श्रेष्ठ, सचिवमा केशव सिग्देल (पवन) र कोषाध्यक्षमा दिनेश श्रेष्ठ निर्वाचित भएका छन् ।
त्यसैगरी कार्यसमिति सदस्यमा मिलन अधिकारी, सञ्जीव तिम्सिना र दोलराज तिम्सिना चयन भएका छन् ।
साधारण सदस्यमा रामबहादुर तामाङ (इजन), जेसिस भट्टराई र दीपक भुजेल रहेका छन् । नवनिर्वाचित कार्यसमितिको पदस्थापन कार्यक्रम शनिबार इटहरीस्थित युवा विकास केन्द्रमा सम्पन्न भएको छ ।
कार्यक्रममा कोशी प्रदेशका प्रेस रजिस्ट्रार तथा कोशी प्रादेशिक सञ्चार प्रतिष्ठानका लीलाराज भट्टराई प्रमुख अतिथिका रूपमा सहभागी थिए ।
कार्यक्रमलाई सम्बोधन गर्दै भट्टराईले राष्ट्रिय फोटो पत्रकार समूह सुनसरीले अघि सारेका कार्यक्रम तथा योजनालाई प्रतिष्ठानले सम्भव भएसम्म सहयोग गर्ने प्रतिबद्धता व्यक्त गरे ।
नवनियुक्त अध्यक्ष ढकालले फोटो पत्रकारहरूको व्यावसायिक तथा क्षमता विकासलाई प्राथमिकतामा राखेर काम गर्ने बताए । उनले आगामी तीन वर्षभित्र सुनसरी जिल्लाका ऐतिहासिक, धार्मिक तथा पर्यटकीय क्षेत्रको पहिचान, संरक्षण र प्रचारप्रसारमा तस्बिरमार्फत योगदान पुर्याउने लक्ष्य रहेको उल्लेख गरे ।
सुनसरीका सम्भावना र विशेषतालाई राष्ट्रियस्तरमा चिनाउँदै समूहलाई देशकै उत्कृष्ट शाखाका रूपमा विकास गर्ने प्रतिबद्धता पनि उनले व्यक्त गरे ।
समूहले फोटो पत्रकारिताको व्यावसायिक विकाससँगै जिल्लाको कला, संस्कृति, पर्यटन तथा ऐतिहासिक सम्पदाको प्रवर्द्धनमा महत्त्वपूर्ण योगदान पुर्याउने अपेक्षा गरिएको छ ।
















Discussion about this post