एकपटक संक्रमण भएपछि पुनः संक्रमण हुन्छ ? अध्ययनले यस्तोे भन्छ

कोरोना महामारीको सुरूमा कसैमा पनि भाइरसविरुद्धको प्रतिरोध क्षमता थिएन । तर, जीवनलाई सामान्य अवस्थामा फर्काउन प्रतिरोधात्मक क्षमता नै महत्वपूर्ण हुन्छ ।

अध्ययनले कोरोना भाइरसलाई लक्षित गर्नसक्ने एन्टिबडी बनाउन सुरु गर्न करीब १० दिन जति लिने गरेको छ र अन्यको तुलनामा गम्भीर बिरामीले सबभन्दा बलियो प्रतिरक्षा प्रतिक्रिया विकास गर्ने देखिएको छ ।

एन्टिबडीको विकास भएपनि दोस्रो पटक कोरोना भाइरसबाट संक्रमित हुन सक्ने देखिएको छ ।

हङकङका तथा अमेरिका लगायतका केही ठाउँमा सुरुवात संक्रमणको केही महिनापछि दोस्रो पटक कोरोना भाइरसबाट संक्रमित भएको रिपोर्ट गरिएको थियो । दुई भाइरसको जेनेटिक कोडलाई अध्ययन गरेपछि पहिलो संक्रमण पुनः बल्झिएकोभन्दा पनि दोस्रो पटक संक्रमित भएको वैज्ञानिकको टोलीले निश्कर्ष निकालेको हो ।

स्वास्थ्य विशेषज्ञ सामान्यतया कोभिड भएका मानिसलाई संक्रमणको विरूद्ध केही प्रतिरक्षा हुनेछ भन्ने विश्वास गर्छन् । तर, लक्षण कम भएका वा नभएकामा प्रतिरोधात्मक क्षमता विकास हुन्छ वा हुँदैन तथा सुरक्षा कति लामो समयसम्म रहन्छ भन्ने थाहा भएको छैन ।

पुनः संक्रमणको केस निकै दुर्लभ हुन्छन् र यो किन हुन सक्छ भनेर बुझ्नका लागि ठूला अध्ययनहरू आवश्यक छन् ।

सार्स कोभ २ को रोग प्रतिरोधक क्षमता कति लामो हुन्छ भनेर जान्नका लागि धेरै समय र अध्ययन भएको छैन, तर त्यहाँ अन्य छवटा मानव कोरोना भाइरस छन् जसले एउटा संकेत दिन सक्छ । छमध्ये चारले सामान्य चिसोका लक्षण देखाउने गर्छन् र प्रतिरक्षा अस्थायी हुन्छ । अध्ययनले देखाएअनुसार केही बिरामी एक वर्षभित्र नै पुनः संक्रमित हुन सक्छ ।

किंग्स कलेज लन्डनमा गरिएको अनुसन्धानले कोरोना भाइरसलाई मार्ने एन्टिबडीहरूको स्तर तीन महिनापछि कम हुँदै गएको देखाएको थियो । साथै, प्रतिरोधक क्षमता हराउँदै जाने भए, यसले खोपका लागि चुनौती निम्त्याउन सक्छ । केही विज्ञका अनुसार हरेक वर्ष खोपको बुस्टर सट लिन आवश्यक पर्न सक्छ ।

एन्टिबडी हराए पनि तिनलाई निर्माण गर्ने बी सेल अझै पनि शरीरभित्रै हुन सक्छ । स्पेनिस फ्लूको बी सेल मानिसमा ९० वर्षपछि पनि फेला परेको छ । यदि कोभिडमा पनि यस्तै भयो भने, दोस्रो संक्रमण पहिलोभन्दा हल्का हुनेछ ।

पहिलो संक्रमणले भविष्यमा हुने संक्रमणबाट बचाउने छ भन्ने ग्यारेन्टी हुँदैन । साथै पुनः संक्रमित व्यक्तिले अरूलाई भाइरस सार्न सक्षम हुनेछन् व छैनन् भन्ने पनि अस्पष्ट छ । त्यसैले, संक्रमणमुक्त भएपनि समाजिक दूरी अपनाउने, मास्क लगाउने, नियमितरुपमा हात धुने, सरसफाइमा ध्यान दिने जस्ता सतर्कता अपनाइरहनु पर्छ ।

कोसीअनलाइनबाट